Ema Maršał z łondanskaha rajona Chakni zaŭvažyła, što z 2014 hoda stan jaje zdaroŭja prykmietna pahoršyŭsia. 29-hadovaja žančyna pakutavała ad pieryjadyčnych hałaŭnych bolaŭ i skurnych vysypańniaŭ, adnak abśledavańni daktaroŭ nie vyjaŭlali prykmiet zachvorvańnia.
«Ja zaŭvažała takija simptomy, jak aknie, pryhniečanaść i bol pa ŭsim ciele, ale śpisvała ŭsio na stres i pierapracoŭki», — patłumačyła Maršał. U lutym 2015 hoda ŭ jaje vyjavili nyračnuju infiekcyju, u vyniku čaho jana prachodziła dva tydni z admysłovym katetaram. Praz dva miesiacy jana ŭpała i surjozna paškodziła ruku, što pryviało da vostrych bolaŭ u ciele.
Zatym brytanka pieraniesła apieracyju pa vydaleńni apiendyksa. Jana nieadnarazova źviartałasia da lekaraŭ, kab znajści pryčynu bieśpierapynnych chvarob, ale miedyki zapeŭnivali, što pacyjentcy prosta nie šancuje. «Zdajecca, byccam kryčyš ŭ biezdań, kali razumieješ, što chvory, ale analizy kažuć pra advarotnaje», — uspaminaje jana.
Maršał praciahvała zmahacca ź simptomami prastudy, spazmami i hałaŭnymi bolami, ale śpis niedamahańniaŭ tolki pavialičvaŭsia. Jana skardziłasia na biessań, stratu pamiaci, vypadzieńnie vałasoŭ i azyzłaść asoby. Pa słovach žančyny, joj pryjšłosia adchilicca ad navakolnych, pakolki mnohija ličyli, što jana dramatyzuje.
Da kanca 2018 hoda sasłablenaje zdaroŭje daviało brytanku da rospačy. Žančyna pryniałasia samastojna šukać chvaroby z padobnymi simptomami ŭ internecie i natyknułasia na artykuł pra atručeńnie mikataksinami. Tady jana źviarnułasia da śpiecyjalistki pa funkcyjanalnaj dyjahnostycy, upeŭnienaja, što znajšła korań prablem.
U chodzie abśledavańnia, praviedzienaha ŭ lutym 2019 hoda, vyśvietliłasia, što ŭzrovień mikataksinaŭ ŭ arhaniźmie Maršał sapraŭdy pieravyšaje dapuščalnyja normy. Ciapier pacyjentka źbiraje hrošy na lačeńnie i płanuje adpravicca ŭ Mieksiku, dzie joj zmohuć akazać nieabchodnuju miedycynskuju dapamohu.
