Minčanka, jakaja dva miesiacy pralažała ŭ komie paśla surjoznaj avaryi pad Radaškovičami, zmahła naradzić na śviet zdarovaje dzicia. Pra heta paviedamili ŭ efiry ANT u čaćvier.
Hałoŭny śpiecyjalist adździeła mieddapamohi maci i dzieciam Ministerstva achovy zdaroŭja Julija Savačkina raspaviała, što pracent vypadkaŭ usioj suśvietnaj praktyki, kali ciažarnaść u paciarpiełaj u DTZ zakančvajecca ščaśliva, mienšy za 0,5. Dadzienuju pacyjentku adnaŭlali nie ŭ adnoj staličnaj arhanizacyi achovy zdaroŭja. Pracu viała cełaja kamanda śpiecyjalistaŭ. Dalej joj treba prajści kurs reabilitacyi.
U avaryju 26-hadovaja Kaleryja Stefanienka trapiła 27 kastryčnika minułaha hoda. U mašynu, dzie ź joj jechaŭ 1,5-hadovy syn, urezaŭsia inšy aŭtamabil. Zahinuli čatyry čałavieki, piaciarych adpravili ŭ reanimacyju. Kali adbyłosia DTZ, žančyna była na piatym miesiacy ciažarnaści. Jana atrymała najciažejšyja traŭmy i była dastaŭlena ŭ balnicu chutkaj dapamohi. Dva miesiacy Kaleryja była nieprytomnaja. Adnak miedyki vyratavali nie tolki žančynu, ale i jaje nie narodžanaje na toj momant niemaŭla.
Na minułym tydni na śviet źjaviłasia dziaŭčynka vahoj 3,2 kiłahrama. Jaje nazvali Alisa.
