Studentu-pieršakurśniku PalesDU Kiryłu Kaješku abviaścili vymovu za toje, što jon raźmiaściŭ na dźviarach svajho błoka ŭ internacie «repradukcyju viasiołkavaha ściaha», paviedamlaje Tut.by.
Fota: Kirył Kaješka.
Razdrukavany na arkušy A4 viasiołkavy ściah Kirył Kaješka prylapiŭ na ŭvachodnyja dźviery 6 śniežnia minułaha hoda. U hutarcy z TUT.BY student raspavioŭ, što zrabiŭ heta «pa prykole»:
— U nas taki łakalny žart.
Jaho susiedzi, jakija pražyvajuć u błoku nasuprać, u adkaz nakleili ŭ siabie malunak pierakreślenaha viasiołkavaha ściaha. Matyvacyja była takaja ž.
— Nijakaj varožaści na hetaj hlebie nie było, — patłumačyŭ TUT.BY Kirył Kaješka.
19 sakavika jamu za viasiołkavy ściah abviaścili vymovu. Jak paznačana ŭ dakumiencie, dyscyplinarnaje spahnańnie ŭžyli «za parušeńnie punkta 8.4 Pravił unutranaha rasparadku dla navučencaŭ va ŭstanovie adukacyi Paleski dziaržaŭny univiersitet ad 2015/11/03 № 15/1, punkta 31 Pałažeńnia ab internacie ŭstanovy adukacyi Paleski dziaržaŭny univiersitet ad 2014/12/30 № 21, jakoje prajaŭlałasia ŭ nalepvańni na dźviery ŭ kalidory internata repradukcyi viasiołkavaha ściaha (internacyjanalny simvał supolnaści leśbijanak, hiejaŭ, biseksuałaŭ i transhiendiernych ludziej), demanstratyŭnym ihnaravańni prośby vychavalnikaŭ źniać repradukcyju, i ŭ adpaviednaści z punktam 1.11 artykuła 126 Kodeksa Respubliki Biełaruś ab adukacyi ad 13.01.2011 № 243-3».
Susiedziam, u jakich visieŭ na dźviarach pierakreśleny viasiołkavy ściah, vymovy nie dali, paviedamiŭ TUT.BY student.
Pa słovach Kiryły nahodaj dla kanfliktu z administracyjaj internata stała jaho hramadskaja dziejnaść.
«Pakul ja nie pakazvaŭ nijakaj aktyŭnaści i byŭ «zvyčajnym» studentam, nichto nie źviartaŭ uvahi na ściah i nijakich prablem ź im nie było. U adzin dzień mnie nie spadabałasia, što vychavalnik internata patrabavaŭ śpisy ź ludźmi na mierapryjemstva, jakoje nie było abaviazkovym i nie ŭvachodzić u navučalny płan, ad kožnaj hrupy pieršaha kursa. Ja skazaŭ, što heta niezakonna, u hutarcy, a potym zrabiŭ post u siabie na ścianie Ukantakcie ab hetaj situacyi, kab raskazać inšym studentam», — raspavioŭ partału dumka.me Kirył.
Jak paviedamiŭ student, paśla hetaha pačałosia niehatyŭnaje staŭleńnie da jaho z boku vychavalnicy internaty.
U administracyi internata № 5 PalesDU heta abviarhajuć:
— U nas u internacie nielha ničoha raźviešvać. U nas isnuje Pałažeńnie ab internacie i pry zasialeńni studenty raśpisvajucca, što ź im aznajomlenyja. U adpaviednaści z dakumientam ni na ścieny, ni na dźviery ničoha nielha nalaplać. U nas tak zaviedziena, — paviedamiła TUT.BY kamiendant internata Alena Litvinčuk.
