Suśvietny bank pahoršyŭ prahnoz pa roście ekanomiki Biełarusi ŭ 2019-2021 hadach i nie vyklučaje recesii ŭ krainie ŭ vypadku adsutnaści kampiensacyi vydatkaŭ biełaruskaj naftapierapracoŭki z-za realizacyi ŭ Rasii padatkovaha manieŭru ŭ naftavaj śfiery.
«Biez kampiensacyi (vydatkaŭ ad padatkovaha manieŭru) rost zapavolicca da ŭzroŭniu nižej za 2%, moža vyraści deficyt rachunku biahučych apieracyj i spatrebicca dadatkovaja kansalidacyja biudžetu. U najhoršym scenary adsutnaści kampiensacyi ad Rasii ekanomika moža skacicca ŭ recesiju z-za skaračeńnia vypusku naftachimičnaj pradukcyi naroŭni z paharšeńniem rachunkaŭ biudžetu i źniešniaj pazicyi», — skazana ŭ apublikavanym dakładzie «Suśvietny bank: Spravazdača ab ekanomicy rehijonu Jeŭropy i Centralnaj Azii — krasavik 2019».
Jak tłumačać ekśpierty Suśvietnaha banka, prahnoz pa roście biełaruskaj ekanomiki ŭ siarednieterminovaj pierśpiektyvie na ŭzroŭni 2% abapirajecca na mierkavańnie, što, jak minimum, pałova vydatkaŭ ad padatkovaha manieŭru usio ž taki budzie kampiensavanaja.
Pa abnoŭlenaj bazavaj acenki Suśvietnaha banka, biełaruski VUP u hetym hodzie moža vyraści na 2,2%, u 2020 hodzie — 2,4% (2,5%), u 2021 hodzie — 2,1% (2,5% ).
Naroŭni z pabočnymi efiektami ad novaj sistemy padatkaabkładańnia ŭ Rasii, da asnoŭnych ryzyk dla biełaruskaj ekanomiki ekśpierty Suśvietnaha banka adnosiać adnosna vysoki dziarždoŭh u zamiežnaj valucie i značny ŭzrovień dalaryzacyi.
