Fota: kremlin.ru.
Kommiersant: Łukašenku dziavacca niama kudy
Palityčny ahladalnik «Kommiersanta» Dźmitryj Dryzie ličyć, što Łukašenku daviadziecca sastupać u intehracyjnych pytańniach.
Žurnalist kanstatuje: pamiž sajuźnikami znoŭ vajna. Jabłyčna-naftavaja. Hrošaj u Biełarusi, zaŭvažaje jon, i tak nie šmat. Heta baluča bje pa vytvorcu i dziaržavie ŭ cełym.
U Rasii jość pieravaha ŭ hetaj sprečcy, piša Dryzie:
— Tak, biełaruski kirunak naftavaha tranzitu važny, ale adkaz moža być jašče strašniejšy. Kali spynić pastaŭki nafty na biełaruskija NPZ, heta pahražaje kałapsam usioj ekanomicy krainy. A kuplać u Vieniesuele abo Narviehii prosta niesurjozna.
Žurnalist «Kommiersanta» adznačaje, što biełaruskaja dziaržaŭnaja madel niemahčymaja biez rasijskaha padsiłkoŭvańnia.
«Adnak viečna tak praciahvacca nie moža. Za ŭsio rana ci pozna treba płacić. Kreml šukaje novy «Krym naš» — karaniovuju ideju. Jamu patrebna intehracyja, novy sajuz, jak by heta ni zvałasia. Alaksandru Ryhoraviču prapanujuć padzialicca suvierenitetam, stać realnym chaŭruśnikam, a nie jak i kali jamu zachočacca. I arhumient — bieź mianie budzie horš, čym va Ukrainie — nie prachodzić», — piša Dryzie.
Jon ličyć, što Łukašenku dziavacca niama kudy, tamu što Minsk — nie Kijeŭ. Akramia Rasii, u Łukašenki niama siabroŭ ni na Zachadzie, ni na Uschodzie.
«Imavierna, pryjdziecca Alaksandru Ryhoraviču sastupać», — vyvodzić Dryzie.
BFM.RU: Łukašenka hnievajecca ad biaśsilla
Ahladalnik BFM.RU Hieorhij Boŭt ličyć, što historyja z hazapravodam «Družba» heta ŭsiaho tolki praciah raspačataj jašče ŭ minułym hodzie sprečki pamiž Maskvoj i Minskam ab tym, ci budzie Maskva kampiensavać biełaruskamu boku jaho straty ad padatkovaha manieŭru ŭ naftavaj śfiery Rasii.
Nie zdoleŭšy damovicca z Maskvoj ab kampiensacyi za padatkovy manieŭr, Łukašenka pavialičyŭ taryf za prapampoŭku nafty. I tut ža atrymaŭ «asimietryčny adkaz» jabłykami i hrušami. Pry hetym naftavy tranzit pa trubapravodzie «Družba» zusim nie źjaŭlajecca dla Rasii biezalternatyŭnym, zaŭvažaje Boŭt.
«Tamu Łukašenka moža kolki choča raspalvacca hnieŭnymi tyradami, adnak «kazyroŭ» u jaho na pieramovach z Rasijaj nie tak užo šmat. Naprykład, Łukašenka vielmi abmiežavany ŭ tym, kab pačać surjoznaje zbližeńnie z Zachadam, uzmacniŭšy za hety košt šantaž u adnosinach da Maskvy. Takoje zbližeńnie budzie paprostu niebiaśpiečnym dla samoha biełaruskaha režymu. Choć asobnyja elemienty takoha šantažu niaźmienna ŭ jaho palitycy prysutničajuć. A tamu ŭ Maskvie vielmi pabłažliva staviacca da takich eskapadaŭ emacyjnaha susieda, addajučy pieravahu na ich nie adkazvać, tym bolš što i sam biełaruski prezident usio ž ni razu nie pierajšoŭ na asoby», — piša Boŭt.
Jon upeŭnieny, što ad Minska pa-raniejšamu čakajuć peŭnych krokaŭ u płanie pahłybleńnia intehracyi. I čakać u Maskvie mohuć jašče davoli doŭha.
«A voś biełaruskaja ekanomika i, mahčyma, sam biełaruski režym mohuć nie vytrymać takoha praciahłaha presinhu z boku ŭschodniaha sajuźnika», — zaŭvažaje ahladalnik BFM.RU.
RNS: Biełaruś nie spynić tranzit
Rasijski ekśpiert u pytańniach enierhietyki Ihar Juškoŭ na sajcie RNS piša, što Biełaruś nie spynić tranzit nafty, tamu što heta niavyhadna joj samoj.
Kali tranzit budzie spynieny, Biełaruś sama sabie hetym naškodzić: jana nie budzie atrymlivać hrošy za tranzit, plus abvastrajucca inšyja enierhietyčnyja pytańni, piša Juškoŭ.
«Sproba Biełarusi cisnuć pryviadzie da inšaha vyniku. U nas jość party Bałtyki — Uść-Łuha i Prymorsk, jość Navarasijsk. Tranzit praź Biełaruś kožny hod źmianšajecca. Ale, viadoma, chaciełasia b, kab tranzit zachavaŭsia, bo šerah centralna-jeŭrapiejskich krain atrymlivajuć naftu mienavita pa hetym kirunku», — piša ekśpiert.
Ura.ru: Rasija ŭ takim Łukašenku nie zacikaŭlena
Rezkija vykazvańni Alaksandra Łukašenki mohuć abiarnucca dla jaho strataj ułady. U takoj situacyi Rasija nie budzie pieraškadžać Zachadu, kali jon raptam vyrašyć likvidavać Łukašenku jak palityčnaha lidara, zajaviŭ «Ura.ru» ekśpiert Mižnarodnaha instytuta humanitarna-palityčnych daśledavańniaŭ Uładzimir Bruter.
«Kali jon budzie takim čynam reahavać na dziejańni Rasii, to jana nie stanie pieraškadžać Zachadu ŭ jaho likvidacyi jak palityčnaha lidara. Jon pavinien razumieć, što Rasija nie zacikaŭlenaja ŭ takim Łukašenku», — skazaŭ surazmoŭca ahienctva. Bruter paraiŭ biełaruskamu lidaru zirnuć na prezidenta Ukrainy Piatra Parašenku, «kali jon dumaje, što kamuści cikavy na Zachadzie». «Chaj pahladzić, čym jon zakančvaje», — udakładniŭ Bruter.
Pravda.ru: Łukašenka nie ŭmieje hulać u chakiej
Sajt Pravda.ru paraŭnoŭvaje Alaksandra Łukašenku z chakieistam, jaki z entuzijazmam nosicca pa placoŭcy, zabivajučy to ŭ adny, to ŭ inšyja varoty.
«Jak vy budziecie stavicca da takoha hulca? Nu, voś i my hetak ža», — piša aŭtar.
Vydańnie piša, što Rasija nie pavinna ździŭlacca, kali Biełaruś zachoča syści na zachad.
«Inšaje pytańnie, ci patrebna Zachadu vitryna raźvitoha sacyjalizmu, jakaja razabjecca biez rasijskich hrošaj? Chutčej za ŭsio, tam płan inšy — pakinuć Minsku rasijskija prefierencyi, zabiaśpiečyŭšy palityčnaje adzinstva Biełarusi z Zachadam», — piša Pravda.ru.
Rasijski žurnalist upeŭnieny, što Maskva ciarpić mnohaje ad svajho partniora, navat uzmacnieńnie «antyrasijskaj rytoryki», ale nie pramy ekanamičny ŭron, jaki nanosicca kantrabandaj na dziaržaŭnym uzroŭni.
«Z ulikam taho, što kožny hod na prefierencyi Biełarusi marnujecca da 6 miljardaŭ dalaraŭ, to Rasija tolki vyjhraje ad sychodu Minska na Zachad», — piša Pravda.ru.
Caŕhrad: Biełaruś nie stała nachabnaj. U adroźnieńnie ad svajho prezidenta
Čarnasociennaje vydańnie «Caŕhrad» ličyć, što Łukašenka rehularna abražaje Rasiju.
«Rasija sapraŭdy «stała nachabnaj» — sprabuje abaraniać svaje zakonnyja pravy i padtrymlivać ułasnaha vytvorcu. My i tak stvaryli svajmu zachodniamu susiedu režym maksimalnaha spryjańnia, šmat u čym trymajem jaho ekanomiku za košt ułasnych srodkaŭ, za košt piensij i zarobkaŭ biudžetnikaŭ», — piša Caŕhrad.
Vydańnie ŭpeŭniena, što naftapravod Łukašenka nie pierakryje:
— Jazyk u Łukašenki, jak viadoma, nadzvyčaj hnutki i zusim pazbaŭleny kostak, ale mazhi ŭ prezidenta Biełarusi jość, — piša «Caŕhrad».
«Stvarajecca ŭražańnie, što pavažanamu Alaksandru Ryhoraviču darujecca ŭsio. Ale my nie budziem adkazvać chamstvam na chamstva. Biełaruś nie stała nachabnaj. U adroźnieńnie ad svajho prezidenta», — piša «Caŕhrad».
U kancy artykuła vydańnie piša, što Biełaruś pavinna albo stać «pakorlivaj małodšaj siastroj Rasii», a to i zusim jaje častkaj, albo stać całkam niezaležnaj ad Rasii krainaj.
«I naša zadača — stvaryć umovy dla taho, kab hety vybar byŭ adzina viernym», — robić vysnovu «Caŕhrad».
