Starejšy syn kiraŭnika krainy Viktar Łukašenka budzie vykonvać abaviazki pieršaha vice-prezidenta Nacyjalnaha alimpijskaha kamiteta. Adbyłosia heta napiaredadni II Jeŭrapiejskich hulniaŭ, jakija adbuducca ŭ Minsku. Jon budzie spałučać hetuju pracu z pasadaj pamočnika prezidenta pa nacyjanalnaj biaśpiecy. «Naša Niva» sabrała cikavyja fakty pra Viktara Alaksandraviča.
Da mamy pryjazdžaje raz na miesiac
Viktar Łukašenka (druhi źleva) z babulaj pa mamie (na piarednim płanie). Fota tut.by.
Viktar Łukašenka naradziŭsia ŭ 1975 hodzie. U bijahrafijach nie pišuć jahonaje miesca naradžeńnia: pa adnych dadzienych — heta Aleksandryja, pa druhich — Škłoŭ, pa trecich — Mahiloŭ. Dziacinstva pravioŭ u Škłoŭskim rajonie, tam skončyŭ škołu.
Padčas adnaho z vystupaŭ Alaksandr Łukašenka raskazaŭ, što biŭ u dziacinstvie syna. «Viktar, jak starejšy, časta atrymlivaŭ ad mianie. Siaredni, Dzima, užo bačyŭ, jak Viciu traplała, i roŭnieńka stajaŭ pobač. Małodšaha, jamu piatnaccaty hod, ja naohuł nikoli nie karaŭ: jon hetaha nie zasłuhoŭvaŭ», — raskazvaŭ Łukašenka-starejšy.
U adnym ź intervju Viktar Łukašenka pryznavaŭsia, što da mamy ŭ Škłoŭski rajon pryjazdžaje prykładna raz na miesiac, asabliva ŭ viasnovy pieryjad, kali treba dapamahčy z harodam.
Navučaŭsia na fakultecie mižnarodnych adnosinaŭ BDU. U čas vučoby, naprykład, paznajomiŭsia z Usievaładam Jančeŭskim, jaki ŭ budučyni adkazvaŭ za ideałohiju ŭ Administracyi prezidenta, a ciapier uznačalvaje Park vysokich technałohij. Paśla vučoby pajšoŭ na pracu ŭ MZS, pracavaŭ u adździele, jaki zajmajecca adnosinami z Zachodniaj Jeŭropaj.
Viktar kazaŭ, što volna razmaŭlaje pa-niamiecku, anhlijskaja ŭ jaho horšaja, ale moža taksama parazumiecca i na joj. U žyćci Viktar pasłuhoŭvajecca ruskaj movaj, ale havoryć z mocnym biełaruskim akcentam.
Starejšy syn Łukašenki padčas pracy ŭ MZS byvaŭ u Hiermanii, Aŭstryi, Bielhii, Niderłandach, ale kaža, što nidzie nie moh zatrymacca bolš čym na miesiac, paŭsiul ciahnuła dadomu.
Słužyŭ u pahraničnym śpiecnazie
Viktar Łukašenka (druhi sprava) z Ramzanam Kadyravym (pieršy sprava) padčas vizitu ŭ Čačniu.
Paśla vučoby Viktar pajšoŭ słužyć u vojska. Trapiŭ u pahraničny śpiecnaz (ASAM). «U mianie staryja paniaćci: liču, što mužyk pavinien adsłužyć. Dola ciahi da pryhodaŭ, napeŭna, taksama była. Uvohule ž chaciełasia prajści hety šlach, stać sapraŭdnym mužykom», — raskazvaŭ syn kiraŭnika krainy ŭ intervju «Kamsamołcy».
Pry hetym Viktar skončyŭ vajskovuju kafiedru, byŭ lejtenantam i moh u vojska nie iści. U ASAMie paźniej słužyŭ i brat Viktara — Dźmitryj. Viktar zapeŭnivaje, što słužyŭ biez achovy. Kali ciapier syna kiraŭnika krainy bačyš u horadzie, to jaho supravadžaje adzin-dva achoŭniki.
«Nikoli nie zabudu svaju pieršuju «kamandziroŭku», tak my nazyvali raźviedvalna-vyšukovyja mierapryjemstvy. Vyjechali na troje sutak. Kaniečnie, biareš z saboj pa minimumie, kab nie ciahać na śpinie. Adčuŭ, što takoje, kali jeści chočacca, kali pić chočacca, a było heta zimoj, było choładna. Jasna, što dapamahać tabie nichto nie budzie, bo ŭsim ciažka. My tam razumieli adzin adnaho z paŭsłova i paŭžesta», — kazaŭ Viktar Łukašenka ŭ videafilmie pra ASAM.
Paśla vojska syn Łukašenki nakiravaŭsia na pracu načalnikam adździeła źniešnieekanamičnych suviaziaŭ NDI srodkaŭ kamunikacyi «Ahat». Kažuć, što tam jon zahadvaŭ prodažam zbroi za miažu.
Kuryruje ŭsich siłavikoŭ
Skryn ź filma pra ASAM.
U 2005 hodzie 29-hadovaha Viktara pryznačajuć pamočnikam prezidenta pa nacyjanalnaj biaśpiecy. Na hetaj pasadzie jon praciahvaje znachodzicca pa siońniašni dzień, chacia čutki adpraŭlali jaho i staršynioj Bresckaha abłvykankama, i kiraŭnikom Pamiežnaha kamiteta.
Možna skazać, što paśla hetaha času Viktar Łukašenka pačaŭ stvarać pad siabie kamandu siłavikoŭ. Nivodnaje pryznačeńnie ŭ siłavym błoku nie adbyvajecca biez prysutnaści Viktara.
Za hety čas adbylisia istotnyja źmieny ŭ hetym błoku. Naprykład, byŭ zasnavany Apieratyŭna-analityčny centr, jaki nazyvajuć hałoŭnaj łukašenkaŭskaj śpiecsłužbaj. Struktura, jakaja adkazvaje za internet, a taksama infarmacyjnuju biaśpieku.
Byŭ stvorany Śledčy kamitet na ŭzor amierykanskaha FBR, a prakuratura pieratvaryłasia ŭ kantralujučy orhan. U asobnuju adzinku byŭ vyviedzieny Kamitet sudovych ekśpiertyz. Istotna ŭzrasła roli Słužby achovy Łukašenki, vychadcy ź jakoj zajmajucca vysokija dziaržaŭnyja pasady.
Byŭ u kłubie, dzie adbyłasia pierastrełka
Na adkryćci bajkierskaha siezona ŭ Minsku. Fota Siarhieja Hudzilina.
Viadoma, što Viktar Łukašenka hulaje ŭ chakiej razam z baćkam. Luboŭ da chakieja ŭłaścivaja ŭsioj siamji kiraŭnika dziaržavy, ale heta daloka nie adzinaja straść, jakaja ŭłaścivaja Viktaru Alaksandraviču.
Viktar Łukašenka — zaŭziaty bajkier. Mienavita jon supolna ź ministram unutranych spravaŭ Iharam Šunievičam štohod adkryvaje bajkierski siezon u Minsku.
Chutkaść pryciahvaje jaho nie tolki ŭ matacykłach. Viktara nieadnarazova bačyli na trybunach padčas etapaŭ «Formuły-1» u AAE. U hetuju arabskuju krainu Viktar naviedvajecca dastatkova časta, jak z baćkam, tak i bieź jaho.
Była ŭ bijahrafii Viktara i vielmi ćmianaja historyja. U 1998 hodzie ŭ načnym kłubie «Maks-šou» u centry Minska prahučali streły, u vyniku jakich byŭ paranieny viadomy chakiejny śpiecyjalist Michaił Zacharaŭ. Niekatoryja haziety ŭ toj čas napisali, što stralaŭ u Zacharava mienavita syn Łukašenki.
Zrešty, potym hetuju infarmacyju abviarhaŭ i sam Zacharaŭ, i sud. Viktar Łukašenka sapraŭdy byŭ tady ŭ kłubie. Ale toj streł ździejśniŭ kryminalny aŭtarytet Alaksandr Łohinaŭ. Jamu dali 12 hadoŭ źniavoleńnia. Termin jamu ŭvieś čas padaŭžajuć. Až da hetaha času jon znachodzicca ŭ źniavoleńni ŭ Vaŭkavysku — užo 21 hod.
Baćka čatyroch dziaciej
Viktar Łukašenka ź siamjoj u dziciačym domie ŭ Kličavie.
Žonka Viktara — Lilija, jana žyła ŭ toj samaj vioscy Aleksandryja, jak i siamja Łukašenkaŭ. Jana na čatyry hady maładziejšaja za muža.
U pačatku 2000-ch Lilija pracavała śpiecyjalistam u «Biełmastackpromysły». Praź niejki čas vypłała infarmacyja, što Lilija ŭznačalvaje pradstaŭnictva kiprskaj kampanii Eastleigh trading Ltd, jakaja naležyła viadomamu biznesmienu Uładzimiru Piefcijevu, jon zrabiŭ svoj kapitał na handli zbrojaj.
Ciapier Lilija Łukašenka ŭznačalvaje mastacki sałon «Art Chaos», jaki znachodzicca ŭ handlovym centry «Dana Moł». Adznačajuć, što ŭ jaje vydatnyja adnosiny z mnohimi biełaruskimi mastakami.
Starejšaja dačka Viktara Viktoryja — studentka fakulteta mižnarodnych adnosin BDU, jana pastupiła tudy ŭ 2016 hodzie. U dziacinstvie dziaŭčynka zdymałasia ŭ kino. Prynamsi, jana syhrała hałoŭnuju rolu ŭ filmie «Na śpinie ŭ čornaha kata».
U Viktara i Lilii jašče jość syn Alaksandr (14 hadoŭ), dačka Valeryja (9 hadoŭ), taksama syn Jarasłaŭ (5 hadoŭ).
Siamja Viktara źjaŭlajecca na teleekranach, kali pierad Novym hodam viazuć padarunki ŭ jaki-niebudź dziciačy dom.
Sam Viktar Łukašenka ŭ rańnich intervju zajaŭlaŭ, što nie choča być prezidentam. Toje samaje ŭvieś čas paŭtaraje Alaksandr Łukašenka, što nichto ź jaho dziaciej nie choča sabie takoj doli.
Hladzi taksama:
Jak Viktar Łukašenka kuplaŭ vyšyvanki i pryhladaŭsia da vokładak z Pahoniaj
