Historyk Alaksandr Hronski, jaki staić na pazicyjach zachodnierusizmu i tryadzinstva biełarusaŭ, ruskich i ukraincaŭ, vystupiŭ sa źniščalnaj krytykaj pradstaŭnikoŭ «ruskaha śvietu» ŭ Biełarusi.
Hronski adznačaje, što sam termin «ruski śviet» staŭ niehatyŭna ŭsprymacca nie tolki va Ukrainie i Biełarusi, ale navat u samoj Rasii. Adnak jon prapanuje nie admaŭlacca ad termina, a nadać jamu novy sens.
Artykuł Hronskaha «Ruski śviet u Biełarusi: prablemy, pierśpiektyvy i pahrozy» byŭ nadrukavany na sajcie «Zachodniaja Ruś», a da hetaha jon byŭ ahučany na kanfierencyi ŭ Maskvie.
Historyk adznačaje, što da farmiravańnia niehatyŭnaha vobrazu «ruskaha śvietu» ŭ Biełarusi spryčynilisia i sami pradstaŭniki hetaha «śvietu». Asabliva dastałasia pradstaŭnikam «rejestravaha ruskaha śvietu», ludziam i arhanizacyjam, jakija aktyŭna supracoŭničajuć z «Rossotrudničiestvom».
Naprykład, byŭ pracytavany artykuł «Našaj Nivy» pra lidara «Rusi maładoj» Siarhieja Łušča. U tym rasśledvańni adzin z paplečnikaŭ Łušča spačatku vyjaŭleny na fota ŭ majcy z nadpisam «88» (u nieafašystaŭ hetaja ličba aznačaje Heil Hitler), a nastupnaj fotcy chłopiec razdaje hieorhijeŭskija stužki.
«Takim čynam, hieorhijeŭskaja stužka i ruski śviet akazalisia źviazanyja ź nieanacystami. I heta nie adziny prykład», — piša Hronski.
«Siarod biełaruskich intelektuałaŭ — pradstaŭnikoŭ niesistemnaha ruskaha śvietu [tak jon nazyvaje blizkich da siabie pa duchu prychilnikaŭ zachodnierusizmu — «NN»] — nazirajecca dosyć rezkaje dystancyjavańnie ad vyznačeńnia siabie častkaj ruskaha śvietu. U pieršuju čarhu heta źviazana z tym, što hetyja intelektuały nie chočuć, kab ich asacyjavali ni z prychilnikami adradžeńnia svastyki, ni ź psieŭdanavukoŭcami, ni ź nieajazyčnikami, ni z abaroncami biełaruskaha kałabaracyjanizmu.
Supracoŭnictva z ruskim śvietam stanovicca taksičnym, a samym dyskredytujučym dla intelektuałaŭ źjaŭlajecca supracoŭnictva z suajčyńnikami i pasolstvam Rasii», — adznačaje Alaksandr Hronski.
«Šyroki raspaŭsiud niejtralnaha napaŭnieńnia termina ruski śviet naŭrad ci stanie mahčymym, kali ŭ jakaści ilustracyj pradstaŭnikoŭ ruskaha śvietu buduć vystupać nieafašysty, nieajazyčniki abo psieŭdanavukoŭcy», — padsumoŭvaje historyk.
Alaksandr Hronski byŭ vykładčykam historyi ŭ BDUIR, ale ciapier źjechaŭ u Maskvu, dzie źjaŭlajecca navukovym supracoŭnikam Centra postsavieckich daśledavańniaŭ instytuta suśvietnaj ekanomiki i mižnarodnych adnosin imia Jaŭhiena Prymakova Rasijskaj akademii navuk.
