«Juryj Blinoŭ pamior na biahu… Jak lehiendarny marafoniec, jaki prynios afinianam viestku pra pieramohu nad piersami. Na žal, Jura takim niemahčyma rańnim finałam nas šakavaŭ, — piša ŭ svaim fejsbuku Barys Tasman.
— Ja paznajomiŭsia ź im paśla adnaho z matčaŭ «Krumkačoŭ». Chłopiec u majcy z nadpisam «Blinoŭ» i šortach ŭ adzinočku supraćstajaŭ bryhadzie AMAPu, jakaja sprabavała vypravadzić sa stadyjona zaŭziataraŭ «krumkačoŭ», što čakali futbalistaŭ z raspranalni. Jon mocna zaikaŭsia, asabliva, kali byŭ uschvalavany, ale nie adstupaŭ. Jaho advaha i zaciataść pierakanali milicejskaha načalnika, i jon daŭ kamandu pakinuć ludziej u spakoi.
Čytajcie taksama: U Homieli padčas paŭmarafona pamior suzasnavalnik «Krumkačoŭ», viadomy pijanist Juryj Blinoŭ
Juryj zaprasiŭ mianie na svoj kancert u k/z «Vierchni horad». Ale ździviŭ jašče da jaho pačatku. Chvilin za dziesiać jon vyjšaŭ na scenu i, znajšoŭšy vačami nas ź Lošam Važnikam i jašče niekalkich znajomych, spuściŭsia ŭ zału, abniaŭ i padziakavaŭ za toje, što my pryjšli. I rabiŭ tak amal zaŭsiody.
Hraŭ Blinoŭ natchniona, jak i ŭsio, čym zajmaŭsia. Jon byŭ łaŭreatam dziasiatka mižnarodnych konkursaŭ pijanistaŭ. Bliskuča vykonvaŭ kancert Šastakoviča dla fartepijana z arkiestram — tvor, jaki patrabuje ad vykanaŭcy vysokaj fizičnaj addačy.
Uvieś čas šukaŭ novyja kirunki ŭ tvorčaści. Hraŭ duety z vykanaŭcami inšych instrumientaŭ. Naprykład, z vybitnaj habaistkaj z Francyi Marykaj Łambardzi. A jaki šykoŭny fartepijanny kancert jany dali razam z Safijaj Hułak 26 krasavika minułaha hoda ŭ fiłarmonii. U zaklučeńnie čaroŭnaha viečara maestra ŭ čatyry ruki vydali virtuozny tvor, paśla jakoha zała ŭźlacieła z kresłaŭ i šalona plaskała ŭ dałoni!
Jura Blinoŭ byŭ rodam z Drahičyna Bresckaj vobłaści. U padziaku rodnamu horadu zasnavaŭ tam mižnarodny konkurs junych muzykaŭ «Paleski ahieńčyk», jaki pravodziŭsia raz na dva hady. Jon układvaŭ u hety vydatny prajekt dušu i niemałyja srodki i ŭ dalejšym praciahvaŭ dapamahać junym talentam.
Tak, minułaj vosieńniu jon razam z 17-hadovym akardeanistam Antonam Malajonkam daŭ dzivosny kancert u «Vierchnim horadzie». A 29 krasavika, heta značyć praz tydzień, tam ža musiŭ adbycca kancert «Maładyja virtuozy» ŭ ramkach jaho novaha prajekta.
Čytajcie taksama: Juraś Blinoŭ. Napiaredadni
Jašče 12-hadovym chłopčykam Jura debiutavaŭ na lehiendarnaj scenie Leninhradskaj fiłarmonii razam ź simfaničnym arkiestram BSSR.
Blinoŭ dziesiać hadoŭ pražyŭ u ZŠA, vučyŭsia i pieramahaŭ tam u mižnarodnych konkursach. Jaho zaprasili ŭdzielničać u mierapryjemstvach, pryśviečanych Hulniam u Sołt-Łejk-Sici, i vystupić u adnym z załaŭ znakamitaha Karniehi-choła. Jon lohka znachodziŭ supolnuju movu ź ludźmi nie tolki tamu, što byŭ šyroka adukavany, vychavany i nadzvyčaj dobrazyčlivy, ale i ad taho, što vałodaŭ bahataj moŭnaj palitraj — biełaruskaj i ŭkrainskaj movami, a taksama anhlijskaj, niamieckaj, francuzskaj, polskaj, italjanskaj…
Jon apantana zaŭzieŭ za «Krumkačoŭ»!
Kali lubimy kłub adčuŭ patrebu ŭ srodkach i abviaściŭ kraŭdfandynh, Jura «adšpiliŭ» značnuju sumu, jakaja šmat u čym dazvoliła «krumkam» zaviaršyć čempijanat 2017 hoda. I pa-dziciačamu radavaŭsia, što ŭ jakaści bonusa atrymaŭ zaprašeńnie ŭdzielničać u treniroŭkach prafiesijnych futbalistaŭ. U dziacinstvie jon pra heta maryŭ! A nieŭzabavie Juryj staŭ suzasnavalnikam novych «Krumkačoŭ» (ciapier NFK).
Blinoŭ byŭ virtuoznym pijanistam i kampazitaram-navataram, doktaram muzyčnych mastactvaŭ. Jon maryŭ pryvieźci ŭ Minsk zorku suśvietnaha futboła Toni Kroasa, jakomu pryśviaciŭ fartepijanny kancert «Concerto-Krooso». Toni zavočna dziakavaŭ Juryju, ale pieramovy ź jaho ahientami pośpiecham nie ŭviančalisia.
Juryj byŭ nadziva polifaničnym čałaviekam, jakoha cikaviła i chvalavała ŭsio pryhožaje i značnaje. Jon dbajna naziraŭ za klimatyčnymi źmienami i publikavaŭ svaje nazirańni tut, u fejsbuku. Pieršyja liściki, pieršyja ŭschody, kvietki — nie moh prajści mima pryhažości, kab nie zachavać jaje j nie padzialicca hetym ź inšymi.
Zaŭsiody dzialiŭsia ŭražańniami ab pajezdkach. Litaralna paru tydniaŭ tamu apublikavaŭ fotaekskursiju i apovied pra naviedvańnie centralnych mohiłak Vieny, dzie spačyvajuć Bietchovien, Brams, Šubiert, baćka i syn Štraŭsy…
U minułuju subotu my sustrelisia pierad pieršym matčam siezonu NFK — «Orša», abnialisia. Jura zaŭsiody abdymaŭ siabroŭ. U pierapynku padyšoŭ da nas i, niby prosiačy prabačeńnia, paviedamiŭ: «Pajedu dadomu — u mianie haračka»…
Bieh byŭ adnym ź jaho zachapleńniaŭ i adnoj z žyćciovych radaściaŭ. Jura biehaŭ šmat. Pieršy paŭmarafon pieraadoleŭ u Miunchienie ŭ 2015-m, pieršy marafon — u Kijevie ŭ 2017-m. Učora jon bieh paŭmarafonskuju dystancyju ŭ Homieli. Moža, nie paśpieŭ adnavicca paśla chvaroby. Moža, varjacki temp žyćcia, jaki jon sabie zadaŭ, złamaŭ jaho mahutny treniravany arhanizm… Jamu stała niadobra pa chodzie biehu, jon niazvykła adstavaŭ, ale nie žadaŭ sychodzić z dystancyi, bo nie pryvyk kidać pačatuju spravu. Pavaliŭsia za piać mietraŭ da finišnaj rysy…
Jura daryŭ tak šmat ciapła ŭsim, chto jaho viedaŭ i lubiŭ, što zaraz nam, jakija zvyklisia da znosinaŭ ź im, jaho abajańnia, uśmieški, budzie ziabka i samotna.
Tvaja muzyka, tvajo ciapło — z nami.
Byvaj, Juryj! Śvietłaja pamiać…
Čytajcie taksama: Naš čałaviek u Techasie (artykuł NN 2002 hoda)
