U Rasii 19 krasavika zatrymali byłoha mažarytarnaha akcyjaniera banka «Juhra» Alaksieja Chocina, jon źmieščany pad chatni aryšt. Chocina abvinavačvajuć u kradziažy 7,5 miljarda rasijskich rubloŭ (104 miljony jeŭra), jakija naležali ŭkładalnikam jahonaha ž banka.
Chocin vioŭ taki zakryty ład žyćcia, što jaho fota źjaviłasia ŭ internecie tolki paśla zatrymańnia. Admietna, što ŭ jaho byli raźbityja bryvo i skuła paśla zatrymańnia. Fota TASS.
Čym nam cikavy Chocin? Bo jon, jak i jahony baćka Juryj, uradžency Biełarusi. Mnohija rasijskija telehram-kanały ŭpeŭnienyja, što suviaź z radzimaj Chocin nie hublaŭ nikoli.
Alaksiej Chocin naradziŭsia ŭ 1974 hodzie ŭ Minsku. Skončyŭ Minskaje suvoraŭskaje vučylišča (1991), a taksama Rasijski ekanamičny ŭniviersitet imia Plachanava (1997).
Razam z baćkam Juryjem vałodali ŭ Biełarusi kaśmietyčnym biznesam «Biełkaśmieks» u Fanipali, adnak sapraŭdnaja viadomaść da ich pryjšła ŭ Rasii. Jak piša vydańnie meduza.io, «Chocin staŭ zaŭvažnym najpierš praz rejdarskija zachopy nievialikich pradpryjemstvaŭ u Maskvie». Chocinu naležyć 1,8 miljona kvadratnych mietraŭ maskoŭskaj nieruchomaści.
Na piku paśpiachovaści košt aktyvaŭ Chocina aceńvaŭsia ŭ $950 miljonaŭ, jon uvachodziŭ u top-100 samych paśpiachovych biznesmienaŭ Rasii. Chocin kuplaŭ u Sulejmana Kierymava haścinicu «Maskva» z handlovym centram «Modnaja halereja» za $500 miljonaŭ. Chacieŭ nabyć i «Urałkalij», ale mała prapanavaŭ. Aproč nieruchomaści, Chociny vałodali taksama naftavymi aktyvami.
Jašče ŭ 2016 hodzie «Viedamaści» nazyvali Chocinych samymi zakrytymi biznesmienami Rasii. Jany absalutna nikoli nie davali intervju.
Alaksieja Chocina źviazvaje siabroŭstva z byłym ministram unutranych spravaŭ Uładzimiram Navumavym (na fota).
Rasijskija vydańni adznačali, što pośpiech Alaksieja Chocina hruntujecca na jaho siabroŭstvie z byłym ministram unutranych spravaŭ Biełarusi Uładzimiram Navumavym, jaki paznajomiŭ biznesmiena z mnohimi ŭpłyvovymi rasijskimi siłavikami, takimi jak były ministr unutranych spravaŭ i śpikier Dumy Barys Hryzłoŭ i dziaržsakratar Rady biaśpieki Mikałaj Patrušaŭ.
«U kampanijach Chocina adčuvajecca armiejskaja dyscyplina i zvyčka da sakretnaści», — adznačajuć «Viedamaści».
Siarod kampańjonaŭ Alaksieja Chocina viadomyja ŭ Biełarusi ludzi. Naprykład, Viktar Łahviniec. Biznesmien, u dačynieńni da jakoha ŭ Biełarusi zaviali kryminalnuju spravu, ciapier jon źjaŭlajecca hiendyrektaram naftavaj kampanii «Duliśma», jakoj vałodaje Chocin.
Śpiavačka Hanna Siemianovič u majcy «Nie śmiašy maje iskandery».
Alaksiej Chocin maje rasijski pašpart. Jon asabista spansiravaŭ prapahandysckija akcyi dyzajniera Anastasii Zadorynaj, jakaja mianiała impartnaje adzieńnie na majki «U trunie ja bačyŭ vašy sankcyi», «Topal sankcyj nie baicca», «Sankcyi? Nie śmiašycie maje iskandery». Spansiravaŭ Načnuju chakiejnuju lihu, stvoranuju Pucinym.
U 2012 hodzie Chociny nabyli bank «Juhra», ofis jakoha byŭ u Chanty-Mansijsku, u vyniku za paru hadoŭ abarot vyras u 38 razoŭ. Zrešty, tady ž bank staŭ rekardsmienam pa vydatkach. U 2017 hodzie Centrabank Rasii pabačyŭ machinacyi ŭkładami ŭ pracy «Juhry», ale praź niejki čas za Chocina ŭstupiłasia Hienieralnaja prakuratura. Rasijskija vydańni miarkujuć, što Chocin nie źjechaŭ za miažu, bo čakaŭ dapamohi ad siłavoha błoka.
Adzin z rasijskich telehram-kanałaŭ paviedamlaje, što Chocin pieravoziŭ svaje hrošy najaŭnymi ŭ Minsk, tak jon nibyta pieravioz kala $80 miljonaŭ.
Inšyja kanały nazyvajuć Chocina «kašalkom» vysokich biełaruskich čynoŭnikaŭ. Maŭlaŭ, mienavita praz hetaha čałavieka pravodzilisia biznes-intaresy ŭ Rasii. Reśpiektabielnyja rasijskija ŚMI ŭstrymlivajucca ad takich farmulovak. Nijakich dakumientalnych dokazaŭ finansavych suviaziaŭ Chocina ź biełaruskimi čynoŭnikami pakul nie pryvodzicca, a telehram-kanały, jakija pišuć pra biełaruskija suviazi Chocina, nie vyłučajucca vysokaj vierahodnaściu.
