Parłamienckija vybary projduć vosieńniu 2019 hoda. U vyniku ciapierašnija deputaty nie dasiedziać u parłamiencie ledź nie čverć svajho terminu — 10 miesiacaŭ.
Aficyjna tłumačycca, što pravieści i prezidenckija, i parłamienckija vybary ŭ adzin hod budzie ciažka.
Ale ci nie vyklikaje abureńnia ŭ deputataŭ taki pieranos vybaraŭ i skaračeńnie terminu paŭnamoctvaŭ?
«Naša Niva» apytała paru čałaviek. Vyhladaje, što jany zadavolenyja.
Voś što skazaŭ ataman Mikałaj Ułachovič.
«Ja ž nie sam pa sabie ŭ parłamiencie. Ja ad partyi vystupaju. My pa pieršym razie, dla nas niepryncypova, my ŭsio adno budziem udzielničać, kab vyjści ŭ druhi tur [imavierna, tut havorka pra druhi termin — Red.] Mianie heta nie chvaluje. Kali b my byli druhi termin, to, moža, dumali b: «Ach!» Ale heta nas pryncypova nie chvaluje, my budziem udzielničać jašče», — skazaŭ Ułachovič.
Što dumaje Alena Anisim?
«Ja b skazała tak, što heta nie najlepšy varyjant, kab paŭnamoctvy byli skaročanyja. Jak my viedajem, heta było zahadzia pradumana i ahučana 19 krasavika. Možna aburacca, možna vykazvać pretenzii, ale heta ničoha nie źmienić. Tamu ja baču adzinaje vyjście dla siabie: pakolki abvieščanaja data vybaraŭ u Pałatu pradstaŭnikoŭ, treba, nie hublajučy času, kab jak maha bolš pradstaŭnikoŭ našaj arhanizacyi byli pradstaŭlenyja ŭ hetym orhanie ŭłady», — skazała Anisim.
Taksama «Naša Niva» raspytała Dźmitryja Šaŭcova, namieśnika kiraŭnika stałaj kamisii pa mižnarodnych spravach Pałaty pradstaŭnikoŭ.
«Mianie heta nie aburaje, ja narmalna staŭlusia, absalutna. Kali heta nieabchodna, niejkimi svaimi pytańniami možna achviaravać, kab narmalna raźvivałasia Biełaruś. Zrazumieła, što ŭ adzin hod ciažka pravieści dvoje vybaraŭ, tamu niejkija treba było razvodzić. Ale ja bolš bałatavacca nie budu», — skazaŭ Šaŭcoŭ.
Vykazaŭ dumku i Vadzim Dzieviatoŭski.
«Ja dakładna nie zasmučany. U hetym jość, tak skažam, racyjanalnaje ziernie, što vybary ŭ adzin hod prezidenckija i parłamienckija… nie prosta tak ich razvodziać, inšymi słovami, — skazaŭ Dzieviatoŭski. — Što datyčyć paŭnamoctvaŭ… Skažam tak. Ja — čałaviek ad sportu. U mianie voś tak: jość pieryjad padrychtoŭki da spabornictvaŭ, značyć, takija realii. Byvaje, źmianiajuć datu, naprykład, praz umovy. Sport mianie daŭno da takich stresaŭ pryvučyŭ, ja mabilny. Maja deputackaja rabota idzie, i ciapier toje, za što ja ŭziaŭsia jak deputat, treba trochu aktyvizavać, paskoryć, pakul jość paŭnamoctvy. Ci čuŭ ja abureńnia kaleh? Viadoma, paśla taho, jak pra pieranos skazaŭ prezident, niejkija razmovy byli, ale ad mianie dakładna nie išło «jak tak?» Ad kaleh ja taksama takoha nie čuŭ».
