Kiraŭnik Čačni Ramzan Kadyraŭ zajaviŭ, što prezident Ukrainy Uładzimir Zialenski jaho rasčaravaŭ paśla inaŭhuracyjnaj pramovy ŭ Viarchoŭnaj Radzie. Pra heta Kadyraŭ napisaŭ u svaim Telegram-kanale.
«Uładzimir Alaksandravič, ja byŭ pra vas zusim inšaha mierkavańnia. Dumaŭ, što paśpiachovy, daśviedčany i viadomy šoŭmien stanie mudrym i razvažlivym palitykam, a vy adrazu pakvapilisia na čužoje. Tak dobryja susiedzi nie robiać! Vymušany rasčaravacca ŭ vas. A tak nie chaciełasia ŭ pieršy ž dzień!» — zajaviŭ Kadyraŭ.
Kadyravu nie spadabałasia, što Zialenski nazvaŭ Krym častkaj Ukrainy.
«Svajoj zadačaj jon nazvaŭ «viartańnie Danbasa i Kryma». Nie budu ničoha kazać pra Danbas, jaki vyciskajecca biezrazvažnymi dziejańniami kiraŭnictva Ukrainy. A što tyčycca Kryma, to paŭvostraŭ u sakaviku 2014 hoda nazaŭsiody viarnuŭsia dadomu ŭ Rasiju i nikudy sychodzić nie źbirajecca! Zialenskamu i jaho budučym pierajemnikam varta nazaŭždy zasvoić, što Krym byŭ, jość i vavieki viakoŭ budzie składovaj častkaj Rasii», — ličyć jon.
Na dumku Kadyrava, «chutčej za ŭsio, inaŭhuracyjnuju pramovu redahavali za akijanam, inakš prezident nie staŭ by ŭ pieršy ž dzień rabić vajaŭničyja zajavy, pahražajučy zachapić terytoryju susiedniaj dziaržavy».
Kadyraŭ pierakanany, što kali b «Rasii patrebnyja byli čužyja ziemli, Kijeŭ daŭno staŭ by abłasnym centram na zachadzie RF».
«Vialiki, pryhožy, kvitniejučy horad! Ale Rasija hetaha nie zrobić nikoli! My pavažajem terytaryjalnuju cełasnaść krainy bratniaha ŭkrainskaha naroda! Nam čužoha nie treba, ale i svajho nikomu nie addamo!», — ličyć Kadyraŭ.
