Čamu Atłantyda? Student Mikita Vušaŭ upeŭnieny, što losy Atłantydy i biełaruskaj movy vielmi padobnyja. Aktyvisty «Atłantydy» arhanizavali «Chutkija spatkańni» ŭ stałoŭcy BDU, prahlady filmaŭ na rodnaj movie, ekskursii ŭ muziei, sustrečy sa znakamitymi biełarusami.
Mikita vučycca na druhim kursie fakulteta prykładnoj matematyki i infarmatyki BDU. Baćki chłopca zaŭsiody razmaŭlali pa-rusku, tamu doŭhi čas biełaruskaja mova była dla jaho tolki vučebnym pradmietam u škole. Ale ŭ staršych kłasach usio źmianiłasia.
— Bolš za ŭsio mianie natchniŭ nastaŭnik pa astranomii. Jon vykładaŭ pradmiet pa-biełarusku. Ja čuŭ zamiest «sołncie» — «soniejka», a zamiest «źviozdy» — «zorački». Lod u maim sercy rastaŭ, i ja vyrašyŭ pasprabavać pierajści na biełaruskuju movu, — uspaminaje Mikita.
Chłopiec pačaŭ pisać pa-biełarusku ŭ sacyjalnych sietkach. Nastupny krok — hutarki na movie ź siamjoj i siabrami, a potym i z usimi navokał.
— Heta byŭ nialohki šlach, — pryznajecca student. — Padčas kardynalnaj pieramieny ja sustreŭ šmat ludziej, jakija mianie padtrymali. Voś tolki sami jany nie advažvalisia zrabić toje ž. Tady ŭ mianie źjaviłasia ideja: čamu b nie stvaryć takuju płatformu, dzie možna było b akunucca ŭ biełaruskamoŭnaje asiarodździe? Kab prosta možna było pryjści i parazmaŭlać.
Na toj momant u chłopca ŭžo byŭ vopyt u arhanizacyi sacyjalnych prajektaŭ. Uviesnu student zapuściŭ ruch «Vandrovar» — abjadnańnie amataraŭ viełasipiedaŭ.
Nastupnym prajektam dla Mikity stała «Atłantyda». Chłopiec sabraŭ kamandu siabroŭ, razam ź jakimi raspłanavaŭ usie detali i padzialiŭ abaviazki.
— Šmat času syšło na toje, kab raspaŭsiudzić infarmacyju praz znajomych, praz sacyjalnyja sietki, — raskazvaje Mikita. — Ciapier u našaj supołcy UKantakcie bolš za 500 čałaviek. Akramia taho, my atrymali kala 70 ankiet ad tych, chto chacieŭ by nam čymści dapamahać.
Pakul «Atłantyda» dziejničaje pa čatyroch kirunkach. Pieršy — «Muziei». Udzielniki damaŭlajucca i razam iduć na ekskursiju.
Jašče adzin — «Kino na movie». Heta prahlad filmaŭ u pierakładzie na biełaruskuju ŭ pryjemnaj kampanii i ŭtulnaj atmaśfiery.
Nastupnaje «dzicia» prajekta — «Chutkija spatkańni». 15 chłopcaŭ i 15 dziaŭčat źbirajucca ŭ stałoŭcy hałoŭnaha korpusa BDU. U kožnaj pary jość piać chvilin, kab paznajomicca. Zatym chłopcy padsadžvajucca da nastupnaj dziaŭčyny. Kožny z udzielnikaŭ adznačaje ŭ śpiecyjalnaj «karcie simpatyj», ci spadabałasia im hutarka z čałaviekam.
Kali ŭsie 15 spatkańniaŭ zavieršany, arhanizatary źbirajuć i praviarajuć ankiety. U vypadku ŭzajemnaj simpatyi ŭdzielnikam dasyłajucca kantakty tych, chto im spadabaŭsia.
— Kožny vybiraje dla hutarki tuju movu, jakaja jamu zručnaja. Ale my papiaredžvajem udzielnikaŭ: kali jany chacieli papraktykavacca ŭ biełaruskaj — heta vydatnaja mahčymaść. Bo ŭsich ludziej na «spatkańni» ty bačyš upieršyniu, tamu i razmaŭlać možaš nie tak, jak zvyčajna, — ličyć kiraŭnik «Atłantydy».
Čaćviortaje mierapryjemstva — «Razmova» — intervju sa znakamitymi biełarusami. Pieršaja sustreča była z bankiram Viktaram Babarykam. Biźniesmien zhadziŭsia na intervju vielmi chutka — dastatkova było tolki napisać jamu ŭ fejsbuku. Na praciahu dźviuch hadzin studenty zadavali Viktaru pytańni, a paśla videaviersija hutarki źjaviłasia ŭ sacyjalnych sietkach.
A paśla byli «Razmovy» ź IT-pradprymalnikam Juryjem Mielničakam i hurtam Naviband.
Mikita ŭpeŭnieny, što papularyzacyja biełaruskaj movy pačynajecca z razbureńnia stereatypaŭ ab joj. «Ja viedaju, što niekatoryja našy suajčyńniki čujuć movu vielmi redka, — kaža Mikita. — Ale čym čaściej ty sustrakaješsia z peŭnaj źjavaj, tym bolš zvykłaj jana dla ciabie stanovicca. Na mierapryjemstvach «Atłantydy» my nie prymušajem nikoha vykarystoŭvać tolki biełaruskuju. Adnak u toj ža čas na joj razmaŭlajuć arhanizatary, drukujucca ankiety. Takim čynam čałaviek uśviedamlaje: biełaruskaja mova, jak i lubaja inšaja, — zvyčajny srodak pieradačy infarmacyi.
«Atłantyda» padaryła Mikitu i znajomstvy, i vopyt, kaža jon.
