Fota Siarhieja Hudzilina
Aŭhustyna (imia źmieniena) vučycca ŭ 11 kłasie adnoj sa staličnych himnazij. 23 maja jana vypadkova daviedałasia, što znachodzicca ŭ BRSM i navat płacić siabroŭskija składki. Choć, śćviardžaje dziaŭčyna, jana nikoli tudy nie ŭstupała, piša Tut.by.
Pra novy fakt svajoj bijahrafii — što źjaŭlajecca siabram BRSM — Aŭhustyna daviedałasia z čata, u jakim udzielničaje jaje kłas. Chtości padzialiŭsia fota dakumienta, na jakim stajali imiony 39 čałaviek z 9-11 kłasaŭ i ich podpisy.
— Ale my hetyja podpisy nie stavili. Bolš za toje — nichto z nas navat nie byŭ u kursie, što ŭ BRSM.
Śpis «tych, chto padpisaŭsia» jość u redakcyi Tut.by. Dakumient nazyvajecca «Viedamaść pa zbory ŭstupnych i pieryjadyčnych členskich uznosaŭ HA «BRSM». U im pieraličanyja imiony 39 vučniaŭ. Usie jany «zdavali» hrošy ŭ adzin dzień — 22 maja 2019 hoda. Z dakumienta možna zrazumieć, što heta byŭ nie ŭstupny ŭznos (nasuprać hetaj hrafy staić pročyrk), a pieryjadyčny, h.zn, usie pieraličanyja ŭ śpisie ŭžo ŭ BRSM. Suma ŭznosu — 1 rubiel. Viedamaść zapoŭnienaja adnym počyrkam i adnym koleram asadki, podpisy — roznymi. Adrasavana jana v.a. pieršaha sakratara Savieckaha rajonnaha kamiteta HA «BRSM» A.A. Markoŭskaj.
Adnakłaśniki, jakija znajšli siabie ŭ śpisie, pačali aburacca, kaža Aŭhustyna. Ale da viečara napał emocyj trochi astyŭ.
— My padzialilisia na dva łahiery. Adny, kudy ŭvajšła bolšaść, vyrašyli nie aburacca, bo «na nastupnym tydni ekzamieny, nas mohuć zavalić» i hetak dalej. Inšyja — litaralna try-čatyry čałavieki — byli nastrojeny rašuča.
Pra heta daviedalisia baćki 11-kłaśnikaŭ. Abmierkavańnie praciahnułasia u ich ahulnym čacie, u jakim udzielničaje i kłasnaja kiraŭnica. Pa słovach Aŭhustyny, jana paabiacała daviedacca, što adbyłosia. Na nastupny dzień, raspaviadaje dziaŭčyna, na piatym ŭroku da ich u kłas pryjšła namieśnik dyrektara z vybačeńniami za «incydent». Aŭhustyna navat zakanśpiektavała jaje słovy: «Vybačajcie, viedamaści adbirajucca ź miesca, kudy ich adnieśli (vierahodna, majecca na ŭvazie Saviecki RK HA «BRSM»). Piedahoh-arhanizatar budzie zvolnienaja pa artykule za parušeńnie — padrobku dakumientaŭ. Ja atrymała vymovu. Prabačcie. Kali vy nie zadavoleny takim rašeńniem pytańnia, možacie padyści da mianie ci dyrektara dla dalejšaha abmierkavańnia».
Aŭhustyna kaža, što nadać ahałoscy hety vypadak jana vyrašyła tamu, što heta dla jaje sprava pryncypu.
— Dla mianie navat nie stolki pryncypova, znachodžusia ŭ BRSM ci nie. Važna ŭ pieršuju čarhu toje, što moj podpis prosta ŭziali — i padrabili. Usio heta vielmi niepryjemna.
Niahledziačy na heta, Aŭhustyna prosić nie nazyvać numar himnazii, u jakoj usio adbyłosia: joj nie chaciełasia b, kab u nastaŭnikaŭ paŭstali prablemy.
Dyrektar himnazii ad kamientaroŭ admoviłasia, spasłaŭšysia na zaniataść u ekzamienacyjnaj kamisii.
U BRSM paćvierdzili, što taki «incydent» sapraŭdy byŭ.
- Naša pryncypovaja pazicyja z nahody ŭstupleńnia ŭ šerahi arhanizacyi zastajecca niaźmiennaj — vyklučna pa žadańni, - kaža pieršy sakratar Savieckaha rajonnaha kamiteta BRSM Anastasija Markoŭskaja. - Viedamaść, pra jakuju idzie havorka, sapraŭdy była pradastaŭlena ŭ Saviecki rajonny kamitet BRSM. Adnak adrazu paśla źvierki z elektronnaj bazaj dadzienych siabroŭ arhanizacyi, što robicca ŭ abaviazkovym paradku, jana była viernutaja ŭ himnaziju z prośbaj dać tłumačeńni, dla čaho i jakim čynam nie siabry BRSM ŭniesieny ŭ viedamaść. Heta pravakacyja, nakiravanaja na padryŭ aŭtarytetu moładzievaj arhanizacyi.
