Andrej Bałabin, skrynšot videa
Pra «Karonu Techna»
U intervju prajektu Barancava saŭładalnik sietki kram «Piaty elemient» Andrej Bałabin siarod inšaha adkazaŭ na pytańnie ab mahčymaj kupli sietki «Karona Techna», jakaja naležyć Paŭłu Tapuzidzisu.
— Budziem kazać tak: na płoščach «Karony Techna» my budziem adkryvać svaje kramy. Ale heta nie značyć, što ja kupiŭ «Karonu Techna». Prosta prajekt bytavoj techniki ŭ «Tytuń-inviesta» skončyŭsia.
Pra vojska i vorahaŭ
Andrej Bałabin skončyŭ Suvoraŭskaje vučylišča, jon vajenny inžynier. Na pytańnie ab tym, chto dla biełaruskaj armii źjaŭlajecca voraham, biznesmien adkazaŭ:
— U nas niama vorahaŭ, my siabrujem z usimi. Na radaści ci na žal — my nievialikaja kraina. I my dakładna nie ahresar. Adpaviedna, našy ambicyi nie raspaścirajucca na čužyja terytoryi. Ci na toje, kab daminavać nad kimści, vajavać. Ale ŭ tym, što my svajo nie addamo — ja ŭpeŭnieny na sto pracentaŭ.
Pra biznes i ŭłady
— Ułada — heta aparat represiŭny. Dziaržava stvarajecca dla taho, kab zabirać.
Dla taho, kab nam dobra žyłosia i spakojna spałasia, jość dziaržava, jakaja abaviazana nam voś hetyja funkcyi pradastaŭlać. Spakoj pa-dobramu. Ale za heta my płacim, kožny z nas: zusim nie važna — biznesmen ty ci prosty čałaviek, ty płaciš padatki. Heta nazyvajecca płata za spakoj. Ty zasynaješ, pračynaješsia i ŭ ciabie ničoha nie adbyvajecca.
Dzieci tvaje spakojna chodziać pa vulicach. Kali ty zachvareŭ, ty vyrazna razumieješ, kudy tabie iści. Kali ty chočaš niečamu navučycca, ty taksama razumieješ, kudy tabie iści. Heta taki dahavor pa aznačeńni.
I voś kali atrymlivajecca, što my damovilisia, a potym mianiajucca ŭmovy dahavora… Ty sadzišsia, umoŭna kažučy, hulać u damino, a zakančvaješ ŭ «durnia», heta samaje drennaje. Mnie zdajecca, što my pavinny praz heta prajści i zrazumieć, što heta lišniaje.
Pra toje, što zahartoŭvaje. Historyja 2014-ha
Nie pierastaju ździŭlacca kožny raz tamu, što nam padkidvaje žyćcio. Heta sapraŭdy zahartoŭvaje. Spačatku ja da takich vypadkaŭ staviŭsia jak da taho, što ŭsio nie prosta prapała. Jak žyć, naprykład, kali ŭ 2014-m vydatnaja była reč, kali zabaranili padymać košty. Šykoŭna prosta! Kurs raście, dachodziła da absurdu: ludzi prychodzili ŭ kramu, kuplali televizary, išli na bazar i pradavali ich za dalary.
Prychodzili adny i tyja ž ludzi, pa try razy na dzień, kuplali znoŭ televizary, pamianiaŭšy ŭ abmieńniku pa novym kursie dalary. Ceny ž nie rastuć!
Historyja z žyćcia
U intervju Bałabin raspavioŭ historyju pra toje, jak ŭ 2014-m paśla narady ŭ Minharvykankamie pra niedachop tavaraŭ u «Piaty elemient» adpraviŭsia Michaił Miaśnikovič, jaki byŭ u toj čas premjer-ministram. Biznesmen pryvioŭ dyjałoh dvuch pakupnikoŭ, jakija ŭbačyli delehacyju čynoŭnikaŭ.
— Dva mužyki stajać i adzin kaža: «Hladzi, heta ž Miaśnikovič». Druhi: «Da nu! Ty ździekuješsia? Jaki Miaśnikovič?» — « Dy nie, sto pracentaŭ! Pahladzi, vakoł stolki mužykoŭ u halštukach. Heta dakładna Miaśnikovič». — «Słuchaj, nu kali ŭžo Miaśnikovič pryjechaŭ pa televizar, biary dva!»
Heta žyćcio. Narod reahuje tak, jak reahuje. Ty ž jamu nie patłumačyš, što čałaviek sapraŭdy pryjechaŭ pahladzieć: ci praŭda adbyvajecca ŭsio tak, jak adbyvajecca.
Čytajcie taksama: Biznesmien Bałabin: Adnaŭlu histaryčnaje abličča chaty Karatkieviča i pieradam horadu
