Niaźmienny hitaryst «Lapisa Trubiackoha» i hurta «Trubiacki» Rusłan Uładyka znachodzicca ŭ komie. Jon trapiŭ u reanimacyju ŭviečary 6 červienia. Pa słovach pradziusara «Lapisa Trubiackoha» Jaŭhiena Kałmykova, u hety viečar Rusłan zajšoŭ u bar na vulicy Sołtysa litaralna na dźvie chviliny. Praz hadzinu jaho znajšli biez prytomnaści, piša Jeŭraradyjo.
«Viečaram 6-ha Rusłan vyjšaŭ ad siastry. Pobač z domam, jaki znachodzicca ŭ Dražni, zajšoŭ u kabak. Na hadzińniku było 22:28. U 22:30, kulnuŭšy na bary čarku, jon adtul vyjšaŭ. Jość videazapis jaho znachodžańnia ŭ bary. Na videa vidać, jak da Rusłana padychodzić čałaviek, jaki da hetaha siadzieŭ za susiednim stolikam pobač z tryma siabrami. Rusłan jamu kiŭnuŭ i vyjšaŭ. U 23:30 Rusłana dastavili ŭ reanimacyju. Chto i dzie jaho znajšoŭ — niezrazumieła. Rodnaj siastry śledstva hetuju infarmacyju nie daje. Rusłan znachodzicca na štučnaj vientylacyi lohkich. Jamu adrazu zrabili apieracyju», — kaža Kałmykoŭ.
Sa słoŭ siastry Uładyki, pry sabie Rusłan mieŭ barsietku, u jakoj byli hrošy, bankaŭskija kartki, mabilny telefon. U reanimacyju muzyku dastavili biez asabistych rečaŭ.
Kiraŭnik pres-słužby Śledčaha kamiteta Siarhiej Kabakovič paviedamiŭ Jeŭraradyjo, što pa fakcie atrymańnia Rusłanam Uładykam cialesnych paškodžańniaŭ Partyzanski RASK h. Minska zavioŭ kryminalnuju spravu. «Na dadzieny momant stan muzyki aceńvajecca jak ciažki. Usie abstaviny zdareńnia vyśviatlajucca», — raspavioŭ jon, admoviŭšysia ŭdakładnić, pa jakim artykule zaviedziena kryminalnaja sprava.
