Fota: mogilew.by.
U kampanii «Jeŭrahandal» skazali Tut.by, što vałodali mienš čym 1% akcyj rasijskaha TAA «Jeŭrahandal-Zachad» i pa sutnaści spravy nie mieli nijakaha dačynieńnia da apieracyjnaj dziejnaści hetaj kampanii. A ciapier «Jeŭrahandal» naohuł nie maje nijakaha dačynieńnia da rasijskaj kampanii. Pavodle infarmacyi biełaruskaha rytejlera, kramy TAA «Jeŭrahandal-Zachad» pradadzienyja rasijskaj sietcy «Mahnit».
Zhodna sa spravazdačnaściu «Jeŭrahandlu», «Jeŭrahandal-Zachad» byŭ ich «dačkoj» da 2014 hoda. Zatym uładalnikam 99% dolaŭ «Jeŭrahandlu-Zachadu» stała kiprskaja kampanija Hanlon Industrial Limited. Zrešty, hetaja ździełka nie zaminała i paźniej atajasamlivać biełaruskija i rasijskija kramy.
Kampanija «Jeŭrahandal-Zachad» źjaviłasia ŭ Rasii ŭ 2012 hodzie jak filijał biełaruskaj sietki kram «Jeŭraopt». U adroźnieńnie ad Biełarusi, u Rasii kramy adkryvalisia pad šyldaj «Jevrotorh». Pieršyja handlovyja abjekty adkrylisia ŭ Smalenskaj vobłaści «jak rehijonie z punktu hledžańnia hieahrafičnaj blizkaści», tłumačyŭ top-mieniedžar kampanii. U najlepšyja hady sietka kram ź biełaruskimi karaniami naličvała kala 35 kram u Bransku, Smalenskaj i Kałužskaj abłaściach.
U 2016 hodzie «Jeŭrahandal» staŭ skaračać svaju prysutnaść u Rasii. Taksama było pryniata rašeńnie pra rebrendynh: šyldy «Jevrotorh» źmianili na «Jevroopt».
U pačatku biahučaha hoda źjaviłasia infarmacyja, što «Jeŭraopt» zakryvaje svaje kramy ŭ Smalenskaj vobłaści i vyśviatlaje adnosiny ŭ miascovych sudach.
U 2015 hodzie ŭładalniki «Jeŭraopta» zakryli svaje kramy ŭ Litvie. A voś biznes u Biełarusi praciahvaje raźvivacca. Niadaŭna «Jeŭrahandal» abviaściŭ ab adkryćci 1000-naj kramy.
