Śviatłana Daŭhunienka z Voranaŭskaha rajona pracuje ahranomam. Hod tamu jana pierajechała rabočuju, jakaja ŭ pracoŭny čas zasnuła na darozie. Rabočaja zastałasia žyvaja, i ciapier jana choča niabłaha zarabić na hetym vypadku.
Padrabiaznaści historyi raspavioŭ «Našaj Nivie» Uładzimir, muž Śviatłany Daŭhunienka.
«Zdaryłasia ŭsio ŭ žniŭni 2018 hoda. Žonka pracuje ahranomam-sadavodam u sielskahaspadarčym pradpryjemstvie «Dociški». U toj złaščasny dzień jana jechała pa sadzie na pracoŭnaj «Nivie»: pamiž pasadkami zastajucca technałahičnyja prajezdy dla techniki. Pa ich jeździać mašyny, traktary.
Žonka ruchałasia pavolna, kala 20 kiłamietraŭ na hadzinu.
Paabapał prajezda pracavali ludzi: vydzirali travu i kidali jaje ŭ prajezd, u mižradździe pamiž drevami.
A ŭ toj travie, jak akazałasia, lažała 32-hadovaja rabočaja Hanna Žehzdryń. Prosta spała tam. I maja žonka pierajechała jaje na mašynie, — uzhadvaje Uładzimir. —
Žančyna zastałasia žyvaja. Adrazu ŭsie padbiehli da jaje, vyklikali chutkuju. I pieršaje, što skazała Hanna majoj žoncy: «Prabačcie, ja sama vinavataja».
Mužčyna pryznaje, paciarpiełaja nie była pjanaja. Ale i spała jana nie ŭ abied, a ŭ pracoŭny čas.
«Padčas pracy nie zabaraniajecca adpačyć. Ale rabočych papiaredžvajuć: kali stała śpiakotna, treba adpačyć, to siadźcie, kab vas bačyli, nie siadzicie na prajezdach», — tłumačyć Daŭhunienka.
Pryjechali daktary, kiraŭnictva. Žančynie akazali dapamohu i zabrali ŭ balnicu.
Paźniej rabočaj dyjahnastavali ciažkija cialesnyja paškodžańni: tresnuŭ taz, padazravali traŭmu mačavoha puzyra, ale abyjšłosia.
«Milicyja pryjechała, kali paciarpiełuju ŭžo zabrali daktary. Travu nie pabačyli, usiu staptali, bo ludzi kinulisia da paciarpiełaj, akazvali joj dapamohu. I ŭ vyniku, śledstva vyrašyła, što travy nie było. Choć śviedki i śćviardžali advarotnaje, — kaža Uładzimir Daŭhunienka. —
Paśla my z žonkaj jeździli da hetaj Hanny ŭ balnicu, pytalisia, čym dapamahčy. Jana ŭžo naniała advakata i ad dapamohi admaŭlałasia, adkazvała, što ŭsio vyrašyć sud».
Sud pastanaviŭ, što Śviatłana Daŭhunienka vinavataja: mahła ŭbačyć žančynu na darozie, parušyła praviły darožnaha ruchu.
«Prakuror prasiŭ 5 hadoŭ abmiežavańnia voli. Ale sud daŭ žoncy taki vyrak: 3 hady abmiežavańnia voli (chatniaja chimija), a taksama vypłacić paciarpiełaj 3300 rubloŭ za sudovyja vydatki», — kaža Uładzimir. Taksama Śviatłanu Daŭhunienka pazbavili pravoŭ na 5 hadoŭ.
Ale na hetym historyja nie skončyłasia. Pa słovach Daŭhunienkaŭ, paciarpiełaja spačatku napisała skarhu: prasiła, kab termin pakarańnia pavialičyli da 5 hadoŭ i kab adpravili nie na chatniuju chimiju, a ŭ kałoniju.
Paśla paciarpiełaja Hanna Žehzdryń padała pazoŭ na haspadarku: spačatku chacieła 100 tysiač rubloŭ kampiensacyi, paśla — 50 tysiač rubloŭ.
Sud pastanaviŭ, što kampiensacyju jana atrymaje — ale troški źmienšyŭ sumu. Paciarpiełaj prysudzili 45 tysiač rubloŭ za maralnuju škodu. Pryčym vyličvać sumu buduć ź siamji Daŭhunienka.
«Ciapier my sprabujem abskardzić kampiensacyju. Kali admoviać, pryjdziecca ŭtrymlivać hetuju žančynu», — aburajecca Uładzimir Daŭhunienka.
Siamja Daŭhunienkaj padała apielacyju na rašeńnie Voranaŭskaha rajonnaha suda.
30 lipienia Hrodzienski abłasny sud razhledzieŭ hetuju apielacyju. I ŭspłyli niečakanyja fakty.
«Vystupili z zajavaj niekatoryja śviedki. Jany raskazali, što svajačka paciarpiełaj pierakanała ich dać niepraŭdzivyja pakazańni na pasiadžeńniach rajonnaha suda. Taja svajačka abiacała dapamahčy śviedkam atrymać dobruju pracu ŭ kałhasie. Jany tady pahadzilisia.
A ciapier śviedki pryznali, što schłusili, paprasili prabačeńnia.
Tamu rašeńnie pa apielacyi pakul nie pryniataje, sud praciahnie razhladać spravu».