Litva abvinavaciła Łatviju ŭ tym, što jana źbirajecca zakuplać biełaruskuju elektraenierhiju ŭ abychod litoŭskaha bajkotu, paviedamlaje LETA. Kabiniet ministraŭ Łatvii ŭčora ŭchvaliŭ paviedamleńnie Ministerstva ekanomiki, u jakim viedamstva prapanavała kuplać elektraenierhiju, u tym liku i biełaruskuju, z Rasii. Pra kanflikt piša delfi.lv.
Da hetaha času krainy Bałtyi zakuplali elektraenierhiju ŭ trecich krain praź Litvu. Tam byŭ adkryty handal ź Biełaruśsiu. Adnak z-za budaŭnictva Biełaruskaj AES Litva vyrašyła spynić mižhraničny handal: susiedzi aścierahajucca, što AES u Astraŭcy niebiaśpiečnaja.
Kab źnizić ryzyki, Ministerstva ekanomiki Łatvii i prapanavała adkryć mižhraničny handal elektraenierhijaj pamiž Łatvijaj i Rasijaj.
Heta ŭschvalavała litoŭcaŭ. Były ministr enierhietyki Arvidas Siakmokas skazaŭ partału 15min.lt, što elektraenierhija ź BiełAES budzie pastupać i ŭ Litvu, tolki ździełki buduć zaklučać łatyšy. Kiraŭnik parłamienckaj Kamisii pa enierhietycy i harmaničnym raźvićci Virhilijus Padziarys skazaŭ, što naviny z Łatvii vyklikajuć zaniepakojenaść i, pa ŭsioj vierahodnaści, heta adkryje rynak dla elektryčnaści ź BiełAES.
Namieśnik dziaržsakratara Ministerstva ekanomiki Dzintars Kaulińš partału Delfi patłumačyŭ, što Litva pryniała nacyjanalnaje rašeńnie, jakoje ŭpłyvaje na Łatviju i Estoniju i ŭ jaho jość dva niehatyŭnyja aśpiekty. Pa-pieršaje, zakryćcio miažy Litvy i rašeńnie nie adkryvać inšuju miažu pryviadzie da źnižeńnia abjomu elektraenierhii i jaje cana vyraście, pa mienšaj miery, na 5%. Pa-druhoje,
usie try krainy Bałtyi płanujuć da 2025 hoda stać niezaležnymi ad biełaruskaj i rasijskaj elektryčnaści. Kab prajekt sinchranizacyi ź Jeŭropaj prajšoŭ paśpiachova, adnosiny z uschodnimi susiedziami lepš nie abvastrać, ličać u viedamstvie. Tak jak zakupka elektraenierhii budzie adbyvacca praź biržu Nordpuł, to «nielha prahnazavać, adkul mienavita idzie elektraenierhija», adznačyŭ Kaulińš.
Namieśnik dziaržsakratara Minekanomiki padkreśliŭ, što pierš čym pryniać hetaje rašeńnie, Łatvija paraiłasia z susiedziami i Jeŭrapiejskaj kamisijaj, adnak joj nie ŭdałosia pryjści da adzinaha mierkavańnia ź Litvoj.
Jak užo paviedamlałasia, Litva ŭ razmovach z Łatvijaj i Estonijaj płanavała padniać pytańnie bajkotu elektraenierhii, vyrablenaj na Astravieckaj AES u Biełarusi. Prezident Litvy Hita Naŭsieda pakazaŭ, što Litva nie choča cisnuć u hetym pytańni, adnak kali na hetaj AES adbudziecca avaryja, to nastupstvy na sabie adčuje ŭvieś rehijon, nie tolki Litva. Na heta prezident Łatvii Ehiłs Levits adkazaŭ, što biaśpieka Astravieckaj AES — absalutny pryjarytet dla Łatvii, bo AES znachodzicca niedaloka ad Łatvii.
