Haradskija aktyvisty stvaryli pietycyju: prapanujuć źmienšyć dazvolenuju chutkaść ruchu ŭ nasielenych punktach da 50 km/h. Pad ich zvarotam padpisałasia 460 čałaviek. Ale zahučali i hałasy suprać.
Ilustracyjny zdymak. Fota Siarhieja Hudzilina
«Ja vadziŭ mašyny ŭ 17 krainach śvietu, u Minsku vadžu amal štodnia i za 23 hady niamała pabačyŭ, — piša zasnavalnik Tut.by Juryj Zisier. — Dyk voś: mnie hetaja vykradzienaja z Zachadu ideja zusim nie padabajecca. Nie va ŭsim treba kapijavać Jeŭropu. Tam vuzkija vułački, i ahulnaje abmiežavańnie 50 u nasielenych punktach zusim apraŭdana. Jość navat zony 30 u centrach maleńkich haradoŭ. Zatoje na bujnych šmatpałosnych vulicach zvyčajna stajać znaki 70 i navat 80, jak u nas raniej było na Pieramožcaŭ i Partyzanskim, a na Niezaležnaści va Uruččy i ciapier 80. Nijakich prablem heta nikomu nie stvaraje.
U nas ža ŭ paŭsiudnym abmiežavańni 50 niama nieabchodnaści, tamu što niama vuzkich vułačak, a dzie treba — užo jość znaki 50 i 40. Asabliva časta možna ŭbačyć 40 u vioskach, dzie vulicy zacisnutyja płatami i ź luboj bramki moža vyskačyć dzicia. Tam i abmiežavańnia 50 budzie niedastatkova.
Kali ž uvieści paŭsiudnaje abmiežavańnie 50, to ja ŭpeŭnieny: znaki, što pavyšajuć chutkaść, na praśpiektach stavić nie buduć. Budziecie ciahnucca pa Pieramožcaŭ z chutkaściu 50.
Jašče ŭ pietycyi absalutna hałasłoŭna i ničym nie abhruntavana śćviardžeńnie ab tym, što abmiežavańnie chutkaści nibyta pavysić chutkaść ruchu. Heta poŭny absurd. Na spravie korki tolki vyrastuć.
A jašče abmiežavańnie chutkaści pavialičyć zahazavanaść, bo mator na małych chutkaściach spažyvaje bolš paliva na kiłamietr, čym na aptymalnaj dla matoraŭ chutkaści 60-70-80, i adpaviedna budzie bolš vychłapnych hazaŭ. Nie vypadkova samaja zahazavanaja ŭ Minsku vulica — Niamiha, mienavita praz zatory. Ekałohija…»
