Łukašenka adznačyŭ, što śviatočnuju estafietu sioleta haścinna prymaje Słonim — adzin sa staražytniejšych haradoŭ Biełarusi, jaki za svajo šmatviakovaje isnavańnie nie adnojčy hieraična pieraadolvaŭ surovyja vyprabavańni. «Jon zachavaŭ histaryčnyja karani i ciapier harmanična spałučaje ŭ abliččy minułaje i sučasnaść», — padkreśliŭ prezident.
«Vialikaja misija Dnia piśmienstva — abjadnoŭvać usich biełarusaŭ śvietu, pieradavać novym pakaleńniam litaraturnyja i mastackija skarby našaha naroda, luboŭ da matčynaj movy, vychoŭvać bieražlivyja adnosiny da pomnikaŭ daŭniny, sadziejničać umacavańniu pačućcia honaru za Radzimu», — havorycca ŭ vinšavańni.
Prezident adznačyŭ, što heta śviata zajmaje pačesnuju pazicyju siarod važniejšych padziej kulturnaha žyćcia krainy i źjaŭlajecca dobraj nahodaj jašče raz źviarnucca da spradviečnych nacyjanalnych tradycyj i asensavać ich miesca ŭ ciapierašnim časie.
***
Tradycyja śviatkavańnia Dnia biełaruskaha piśmienstva zaradziłasia ŭ 1994 hodzie, kali 28 žniŭnia ŭ Połacku ŭpieršyniu prajšli ŭračystaści ŭ honar Dnia biełaruskaha piśmienstva i druku.
U 2019 hodzie Dzień biełaruskaha piśmienstva projdzie ŭ Słonimie. Z 31 žniŭnia pa 1 vieraśnia ŭsie centralnyja vulicy horada na adzin dzień pieratvoracca ŭ jarkuju sceničnuju placoŭku. Prahrama śviata tut.
Napiaredadni Dnia biełaruskaha piśmienstva ŭ histaryčnym centry Słonima ŭstalavany pomnik Lvu Sapiehu. Vyšynia bronzavaj statui razam z hranitnym pastamientam pieravyšaje 4 m. Aŭtary pomnika — skulptary Ivan Misko, Uładzimir Pipin i Siarhiej Łohvin.
