U parłamient źbirajecca bałatavacca siabra «Havary praŭdu» Jaŭhien Kazłoŭski. Junak idzie pa Čkałaŭskaj akruzie, jaho kankurentam budzie pasoł Biełarusi ŭ Turcyi Andrej Savinych.
Kazłoŭski — palitołah pa adukacyi, ale pracuje namieśnikam dyrektara pryvatnaj arhanizacyi, jakaja zajmajecca nierehularnymi pasažyrskimi pieravozkami (TAA «Alimp Kar»).
Fota — Jeŭraradyjo
Jon źbirajecca vyłučacca ad fantomnaj Respublikanskaj partyi (nie błytajcie z zadniapranaŭskaj Respublikanskaj partyjaj pracy i spraviadlivaści). Respublikanskaja partyja — faktyčna miortvaja struktura, aktyŭnych dziejańniaŭ daŭno nie viadzie, navat sajt partyi nie abnaŭlaŭsia hadoŭ 15.
«Apošnim časam ja addalajusia ad «Havary Praŭdu», u mianie svoj šlach. Tak, ja siabra «HP», ale ŭ nas adroźnivajucca pohlady… Kankretyzavać ja nie mahu, — raspavioŭ «Našaj Nivie» sam Jaŭhien Kazłoŭski. — Što tyčycca Respublikanskaj partyi, to cetlik «praŭładnaj» na jaje nakłaŭsia, bo partyja doŭha maŭčała. I ciapier my namahajemsia adnavić partyju, inicyjavać jaje abudžeńnie, bo pryśpieŭ čas štości kazać.
Budziem zacikaŭlivać moładź, pryciahvać novych paplečnikaŭ. U budučyni na bazie našaj partyi chočam stvaryć Centr zakanadaŭčych inicyjatyŭ, kab padklučać da stvareńnia zakonaprajektaŭ hramadzianskuju supolnaść. U Biełarusi treba raźvivać biznes, dać moładzi mahčymaść zajmacca biznesam i raźvivać jaho».
Apošniaje, što było čuvać pra Respublikanskuju partyju — heta «akcyja», nakiravanaja na padtrymku kansiervatyŭnych siamiejnych kaštoŭnaściaŭ. Uletku nieviadomy žorstka źbiŭ režysiora Mikałaja Kupryča, za jaho słovy ŭ padtrymku ŁHBT. Paśla aktyvisty zakleili ścieny na Kastryčnickaj ulotkami z tekstam «Tak, ja taksama p***r» (mienavita za hetuju frazu Kupryča i źbili).
U adkaz aktyvisty Respublikanskaj partyi raskleili na tych ža ścienach svaje ŭlotki: ŭ padtrymku «narmalnaj seksualnaj aryjentacyi» i tradycyjnaj siamji.
Kazłoŭski kaža, što jamu taksama blizkija tradycyjnyja kaštoŭnaści:
«Maja pazicyja da ŁHBT nie rezkaja. Ale rezkaja da ŁHBT-prapahandy. Kali hiej-prapahanda padajecca jak norma, jak karyść, to heta niapravilna. Za hiej-prapahandu treba ŭvodzić adkaznaść, ale nie nadta žorstkuju. Dastatkova administratyŭnaj adkaznaści i štrafaŭ. Usio ž u sučasnym śviecie musić być humanny padychod. Sadžać za heta nie treba nikoha.
Varta ŭdakładnić: ja maju na ŭvazie ŭ pieršuju čarhu infarmacyjnuju prapahandu. Kali dvoje mužčynaŭ iduć za ručku — heta dapuščalna. A kali praź miedyja naviazvajucca hramadstvu ŁHBT-kaštoŭnaści — heta prablema.
Ale navat kali ja zmahu trapić u parłamient, to z hetaj temaj ja zmahacca nie płanuju. Heta apošniaja prablema, jakaja siońnia nas cikavić. Prablem u krainie chapaje, pryčym bolš aktualnych».
Lidar «Havary praŭdu» Andrej Dźmitryjeŭ nie bačyć asablivaj prablemy ŭ tym, što siabar «HP» budzie vyłučacca ad Respublikanskaj partyi.
«Ja staŭlusia da hetaha jak da cikavaha ekśpierymientu.
Heta partyja šmat hadoŭ nie vieła anijakaj dziejnaści. Zaraz «pračnułasia». Ci zdoleje Jaŭhien zrabić tak, kab jana dziejničała i pry hetym sam zachavać svaje kaštoŭnaści? Pabačym», — razvažaje Dźmitryjeŭ.
Taksama jon prakamientavaŭ i zajavy Kazłoŭskaha pra štrafy za hiej-prapahandu:
«Jon sprabuje chajpanuć na temie i vydzielicca praz heta. Nie vielmi ŭdała, choć vy voś zaŭvažyli.
My nie siekta, a demakratyčnaja hramadskaja arhanizacyja. Siabry mohuć mieć svajo mierkavańnie navat kali jano nie supadaje ź mierkavańniem arhanizacyi. Adziny šlach źmianiać pohlady — heta vieści adkrytuju dyskusiju. Našy pryjarytety siońnia budujucca na tym, što kažuć nam našy vybarščyki. Biełarusam zaminajuć budavać siamju nizkija zarobki i adsutnać upeŭnienaści ŭ zaŭtrašnim dni. Hetyja temy dla nas pryjarytetnyja».
