Sud admoviŭsia zakryvać praces nad adkaznym supracoŭnikam Śledčaha kamiteta, jakoha vinavaciać u padbuchtorvańni da chabaru ŭ 25 tysiač dalaraŭ, piša Radyjo Svaboda.
Sudździa Alaksandr Voŭk nie pahadziŭsia ź dziaržaŭnym abvinavaŭcam Siarhiejem Hirhielem i pastanaviŭ razhladać u adkrytym režymie spravu Andreja Kačura, byłoha namieśnika načalnika adnoj z upraŭ Śledčaha kamiteta, abvinavačanaha ŭ padbuchtorvańni da dačy chabaru.
Prakuror davodziŭ, što sa spravy Kačura vyłučanaja inšaja sprava, ab machlarstvie; jana jašče nie rasśledavanaja, i tamu nibyta treba zachavać tajnu śledstva. Pavodle prakurora, Śledčy kamitet taksama byŭ za toje, kab spravu Kačura razhladali ŭ zakrytym režymie. Za heta vykazalisia i padsudny ź jaho advakatam.
U lutym 2019 hodu svaje pasady ŭ centralnym aparacie Śledčaha kamiteta pakinuli Illa Vałozin, načalnik upravy rasśledavańnia ekanamičnych złačynstvaŭ, i Andrej Kačur, namieśnik načalnika ŭpravy — načalnik adździeła kamplektavańnia kadrami i ideałahičnaj pracy. Andrej Kačur byŭ uvohule zvolnieny sa Śledčaha kamiteta, suprać jaho zaviali kryminalnuju spravu pavodle častki 5 artykuła 16 i artykuła 431 — «padbuchtorvańnie da dačy chabaru». Inšyja abstaviny spravy Andreja Kačura nieviadomyja.
U Śledčym kamitecie ad kamientaroŭ ciapier admaŭlajucca. U lutym staršynia SK Biełarusi Ivan Naskievič skazaŭ ab pryčynie adstaŭki Kačura i Vałozina, što infarmacyja pra ich źjaviłasia ad «sumiežnaj ustanovy».
Andrej Kačur ciapier pracuje pa najmie ŭ indyvidualnaha pradprymalnika, jaki nosić takoje ž proźvišča — Kačur.
Padsudny nie ŭziaty pad vartu, u sud jon prychodzić sam. Pavodle prakurora, Kačur znachodzicca pad padpiskaj pra niavyjezd. Pavodle abvinačavańnia, havorka ŭ spravie Kačura idzie pra sprobu atrymać chabar pamieram 25 tysiač dalaraŭ. Vinu Kačur pryznaŭ całkam.