Zhodna z vynikami apytańnia, ukraincy siarod lidaraŭ inšych krain lepš za ŭsio staviacca da kiraŭnika Biełarusi Alaksandra Łukašenki: 66% stanoŭča i tolki 15% — admoŭna. Ličby daśledavańnia apublikavany na sajcie sacyjałahičnaj hrupy «Rejtynh», jakaja pravodziła apytańnie.
Da kanclera Hiermanii Anhieły Mierkiel stanoŭča staviacca 60% apytanych, admoŭna — 17%. Da prezidenta Polščy Andžeja Dudy stanoŭča staviacca 48%, admoŭna — 9%, 18% — nie viedajuć takoha palityka. Da prezidenta Francyi Emanuela Makrona stanoŭča staviacca 39%, admoŭna — 17%, nie viedajuć takoha — 15%, nie zmahli vyznačycca z acenkaj — 29%. Da premjer-ministra Vialikabrytanii Borysa Džonsana stanoŭča staviacca 33%, admoŭna — 11%, nie viedajuć jaho — 27%, nie zmahli adkazać — 30%. Da prezidenta ZŠA Donalda Trampa stanoŭča staviacca 30%, admoŭna — 42%, nie zmahli acanić — 25%.
Aŭdytoryjaj daśledavańnia stali 3 tysiačy respandentaŭ — hramadzian Ukrainy ad 18 hadoŭ i starejšych. Vybarka reprezientatyŭnaja pa ŭzroście, pole, rehijonach i typu pasielišča. Apytańnie pravodziłasia ŭ farmacie intervju z 29 kastryčnika pa 4 listapada.
Sacyjałahičnaja hrupa «Rejtynh» (Rating Group Ukraine) stvorana ŭ 2008 hodzie jak niezaležnaja daśledčaja arhanizacyja, jakaja śpiecyjalizujecca na praviadzieńni ŭsich vidaŭ sacyjałahičnych daśledavańniaŭ z zachavańniem mižnarodnych standartaŭ.
