Staršynia Kamiteta dziaržaŭnaha kantrolu Leanid Anfimaŭ naviedaŭ siońnia majsterniu mastaka i dyzajniera Uładzimira Ceślera.
Leanid Anfimaŭ adznačyŭ, što pretenzij da vykarystańnia majsterni ŭ kantraloraŭ niama.
«Toje, što ŭ pamiaškańni majecca łožak, abstalavanaja kuchnia, — heta narmalna. Ja nie baču tut prablemy: mastak pavinien tvaryć i mieć mahčymaść adpačyć», — adznačyŭ kiraŭnik KDK.
Što tyčycca pytańnia lhot pa arendnaj płacie hramadskim abjadnańniam, to jano patrabuje dadatkovaha vyvučeńnia ŭ kožnym kankretnym vypadku.
«Ja dobra viedaju śpiecyfiku raboty tvorčych majsterniaŭ, u tym liku dyzajnierskich. U acency vykarystańnia majsterniaŭ nieabchodna likvidavać roznačytańni nakont taho, što ličyć tvorčym pracesam, a što — kamiercyjnaj dziejnaściu. Siońnia hetyja pytańni dakładna nie adrehulavanyja», — ličyć Leanid Anfimaŭ.
Fota: Radyjo Svaboda.
Nahadajem, raniej kantralory naviedalisia ŭ majsterniu viadomaha dyzajniera Uładzimira Ceślera, vydadzienuju jamu Biełaruskim sajuzam mastakoŭ. Jamu padvysili arendnuju płatu za majsterniu ŭ niekalki razoŭ, bo znajšli tam łožak.
«Kamisija pryjšła, pahladzieła majsterniu. Ja ž u majsterni praktyčna dzień i noč pracuju. I jakija ty tam stvoryš umovy, tak tam i budzie pracavacca. Ja zrabiŭ tak, jak liču patrebnym, i toje, što ŭ mianie jość dzie paspać, heta ich naohuł nie tyčycca. U ich, vidać, svaje ŭjaŭleńni pra majsterniu, jana, vidać, pavinna być brydkaj. A ja tut ramont zrabiŭ. Naohuł ja ŭžo ŭ majsterni 31 hod, i mahli b jaje ŭžo i padaryć. Bo my jaje ŭžo vypłacili niekalki razoŭ», — kaža Uładzimir Ceśler.
Čytajcie taksama: U majsterni Uładzimira Ceślera znajšli łožak, i arenda vyrasła ŭ 4 razy
