U efiry amierykanskaha hramadskaha radyjo NPR prahučała pieradača, pryśviečanaja adnosinam Biełarusi i ZŠA. U joj uziali ŭdzieł były pamočnik dziaržsakratara ZŠA (pry Džordžu Bušu) Denieł Fryd, supracoŭnica pravaabarončaj arhanizacyi Freedom House Safija Arłoski i prezident Jamestown Foundation Hlen Hoŭvard, pieradaje Radyjo Svaboda.
Dyskusiju viała žurnalistka Mišel Keleman, śpiecyjalistka pa pytańniach Uschodniaj Jeŭropy.
Na pačatku pieradačy viadučaja nahadała, što Biełaruś — adna z samych represiŭnych krain Jeŭropy i što joj užo čverć stahodździa kiruje adzin čałaviek. «Dyk čamu administracyja Trampa imkniecca palepšyć suviazi ź im ciapier?» — zadała pytańnie Keleman.
Pra ŭpłyŭ na Biełaruś
Cisk nie spracavaŭ. Infarmacyjny ŭpłyŭ nie spracavaŭ. Davajcie prajaśnim, što ź Biełaruśsiu ničoha nie atrymałasia. Tamu što hetaja administracyja sprabuje znoŭ. Maje čakańni aściarožnyja, i ja nie źbirajusia asudžać ich za heta. (Denieł Fryd)
Pra niezaležnaść
«Pakul Biełaruś zachoŭvaje svoj suvierenitet navat pry miascovym despacie, heta nie kaniec. Pakul jość žyćcio, jość nadzieja, i budučynia moža być inšaj. Ale kali Rasieja pahłynie Biełaruś, hulnia skončycca — i epik fejł [poŭny krach]». (Denieł Fryd)
Pra abmien ambasadarami
Heta sapraŭdy karysna dla ludziej u Złučanych Štatach i Biełarusi. Ale ŭ toj ža čas my bačym, što ZŠA stali bolš miakkimi ŭ pytańniach pravoŭ čałavieka i demakratyi, i heta dvuchbakovaje ŭzajemadziejańnie ź Biełaruśsiu. I heta, viadoma, padstava dla niepakoju, tamu što tam nasamreč nie stanovicca lepš. (Safija Arłoski)
Pra «apošniaha dyktatara Jeŭropy»
U jaho jość pačućcio humaru, i jon niejak raniej žartavaŭ, što jon užo nie apošni dyktatar Jeŭropy. Jon skazaŭ: ja ciapier pobač z apošnim. Jon viedaje rasiejskuju psichiku i viedaje, što pryjarytetami Pucina źjaŭlajecca słavianskaje pamiežža Rasiei, Ukrainy i Biełarusi. (Hlen Hoŭvard)
Pra «patrebnaha dyktatara»
Časam patrebien taki čałaviek, jak Cita (juhasłaŭski dyktatar — RS), kab supraćstajać Stalinu (abo Pucinu). U hetym vypadku ŭ vas jość niechta Łukašenka, jaki stanovicca Cita, jaki abaraniaje naš Uschodni fłanh ad hetaha rasiejskaha ŭvarvańnia ŭ rehijon, jaki vielmi, vielmi stratehična važny. (Hlen Hoŭvard)