Pradstaŭniki ŭłady i apazycyi Hruzii, jakija ŭsiu niadzielu viali pieramovy ŭ rezydencyi pasła ZŠA ŭ Tbilisi, zmahli damovicca ab reformie vybarčaj systemy ŭ Hruzii i pra toje, što parlamenckija vybary ŭ 2020 hodzie projduć pavodle źmiašanaj systemy, ale sa značnym skaračeńniem mažarytarnych deputataŭ, piša radyjo «Svaboda».
Ciapier sa 150 deputataŭ parlamentu 77 abirajucca pavodle partyjnych śpisaŭ, a 73 — pa mažarytarnych akruhach. Vybarčy paroh dla partyjaŭ pry hetym składaje 5%. Apazycyjnyja palityki i eksperty ličać, što źmiašanaja systema dazvalaje kiraŭničaj partyi «Hruzinskaja mara» vykarystoŭvać administracyjny resurs u mažarytarnych akruhach, što značna pavialičvaje jaje šancy na pieramohu, a vysoki prachadny barjer adsiakaje ad parlamantu drobnyja apazycyjnyja partyi.
Ad 14 listapada la ścien parlamentu ŭ Tbilisi praciahvajucca masavyja pratesty z patrabavańniem reformy vybarčaj systemy, jakija palicyja niekalki razoŭ razhaniała z užyvańniem vadamiotaŭ. Niekalki lideraŭ pratestaŭ byli aryštavanyja i atrymali administracyjnyja terminy.
Zaraz 120 deputataŭ sa 150 buduć abirać pa partyjnych śpisach, i tolki 30 — pa mažarytarnych akruhach. Pry hetym prachadny barjer dla partyj budzie źnižany da 1%, a dla farmiravańnia bolšaści ŭ parlamencie partyi budzie nieabchodna nabrać 40% hałasoŭ deputataŭ.
Nastupnyja parlamenckija vybary ŭ Hruzii pavinny adbycca ŭ kastryčniku 2020 hodu.
Zhodna z padpisanym dakumentam, kiraŭničaja partyja «Hruzinskaja mara» abaviazvajecca taksama zrabić usie zachady dla chutčejšaha vyzvaleńnia z turmaŭ apazycyjaneraŭ i spynieńnia kryminalnych spravaŭ suprać apazycyjnych lideraŭ.
