Andrej Uciuryn, vsr.mil.by
U aŭtorak, 10 sakavika, Viarchoŭny sud pačynaje razhladać hučnuju «spravu Uciuryna». Pasiadžeńni buduć prachodzić u pamiaškańni suda Maskoŭskaha rajona. Tut raźmieščana adna z samych vialikich załaŭ, jakaja moža źmiaścić bolš za sotniu čałaviek. Abvinavačanym vystaŭleny dva artykuły Kryminalnaha kodeksa: art. 430 (Atrymańnie chabaru) i art. 431 (Dača chabaru). Pa kryminalnaj spravie tolki ŭ chabarnikaŭ kanfiskavana bolš za 1,65 miljona dalaraŭ, 62 tysiačy jeŭra, bolš za 1 kiłahram zołata, piša Tut.by.
Pra toje, što ŭ namieśnika Dziaržsakratara Rady Biaśpieki Andreja Uciuryna źjavilisia prablemy z zakonam, stała viadoma ŭ krasaviku 2019 hoda.
«Jon byŭ zatrymany z dokazami złačynstva pry atrymańni 148 600 dalaraŭ ZŠA ad pradstaŭnika rasijskaj kamiercyjnaj struktury «H» za sadziejničańnie ŭ prasoŭvańni jaje intaresaŭ u Respublicy Biełaruś. Apošniamu pradjaŭlena abvinavačańnie ŭ dačy chabaru», — tak prakamientavali ŭ KDB kryminalnuju spravu.
Razam z Uciurynym za kratami apynuŭsia były hienieralny dyrektar «Biełtelekama» Siarhiej Sivadziedaŭ. Pa paviedamleńni KDB, słužbovyja asoby brali chabary za zaklučeńnie dahavoraŭ, jakija praduhledžvajuć u tym liku madernizacyju telekamunikacyjnaha aparatna-prahramnaha kompleksu i pastaŭku abanienckich prystavak z ubudavanym modulem Wi-Fi; zakupku licenzij dla telekamunikacyjnaha abstalavańnia, prahramnaha zabieśpiačeńnia i abarony infarmacyi. Usiaho pa spravie prachodzić 16 abvinavačanych, piaciora ź ich pryznali vinu i zaklučyli ździełku sa śledstvam.
Padčas papiaredniaha słuchańnia ŭ Viarchoŭnym sudzie 12 lutaha advakat Andreja Uciuryna prasiŭ zakryć praces. Jak pieradavaŭ z zały suda «Sputnik Biełaruś», abvinavačany taksama źviartaŭsia ŭ sud z takoj prośbaj, pakazvaŭ, što ŭ materyjałach spravy ŭtrymlivajucca sakretnyja źviestki, jakija adnosiacca da času jaho słužby ŭ Radzie biaśpieki. Sud vyrašyŭ razhladać spravu ŭ adkrytym režymie.
16 fihurantam zaličyŭ dva artykuły Kryminalnaha kodeksa: art. 430 (Atrymańnie chabaru) i art. 431 (Dača chabaru). Kančatkovaja suma chabaru Andreja Uciuryna składaje 190 tysiač dalaraŭ. A staršynia praŭleńnia AAT «Biełaruski mižbankavy raźlikovy centr» Fieliks Kaśpiarovič i namieśnik načalnika Hałoŭnaha ŭpraŭleńnia infarmacyjnych technałohij Nacyjanalnaha banka Andrej Padhorny abvinavačvajucca ŭ atrymańni chabaraŭ ŭ ahulnaj sumie nie mienš za 868 750 dalaraŭ.
Niekatorym słužbovym asobam pahražaje da 15 hadoŭ pazbaŭleńnia voli.
