Zasłužanaja artystka Biełarusi, byłaja vakalistka hurtoŭ «Čaraŭnicy» i «Vierasy», 67-hadovaja śpiavačka i kampazytarka Nadzieja Mikulič zachvareła na karanavirus. Ciapier jana znachodzicca ŭ 6-m špitali Miensku, paviedamlaje «Radyjo Svaboda».
Analiz na karanavirus uziali taksama ŭ jaje muža Barysa Biełaha, u minułym administratara hurtu «Vierasy». Nadzieja Mikulič raspaviała «Svabodzie» pa telefonie pra toje, što ź joj adbyłosia.
«Muž, ja dumaju, taksama trapić u špital»
Nadzieja Mikulič chvareje z 23 sakavika.
— Lačyli antybijotykami na ŭsialaki vypadak, ale temperatura nie źnižałasia. Ja paprasiła, kab mnie zrabili zdymak. Renthien pakazaŭ, što ŭ mianie padazreńnie na levabakovuju pneŭmaniju. Na nastupny dzień zrabili kamputarnuju tamahrafiju, jakaja pakazała dvuchbakovuju pneŭmanijaju, U subotu mianie pakłali ŭ 2-hi špital Miensku. A pierad hetym zrabili analiz na karanavirus. U paniadziełak mnie pazvanili z sanepidemstancyi i skazali, što ŭ mianie mierkavany karanavirus, i tady mianie pieraviali ŭ 6-ty špital. Ciapier u mianie pneŭmanija dvuchbakovaja i karanavirus. Lačusia.
Nadzieja Mikulič kaža, što adčuvaje siabie bolš-mienš narmalna.
— Tut prosta niama ruchu. Tolki ŭ pałacie i da tualetu dajści, nikudy nielha chadzić. Kali ja pa vulicy išła, to zadychałasia, nie chapała pavietra. Ciažka było dychać apošnija dni. I dahetul ciažka dychać. Kožny dzień praviarajuć nasyčanaść kryvi kisłarodam. U mianie krychu panižanaja — treba 100%, a ŭ mianie 92%.
Śpiavačka raspaviała, što ŭ aŭtorak analiz na karanavirus uziali ŭ jaje muža.
— Siońnia pryjaždžali da muža, pradezynfikavali ŭsiu kvateru. Praz try dni budzie vynik. Muž taksama pačynaje siabie drenna adčuvać. U jaho vusny sochnuć. Ale ŭsio roŭna źbirajecca na daču źjeździć na niekalki dzion, a potym, ja dumaju, što jon taksama trapić u špital. My ž razam byli, u adnoj kvatery žyviem.
«Ja jašče adpracavała 21 sakavika kancert u sanatoryi ŭ Ŭździenskim rajonie»
Śpiavačka i rybačka Nadzieja Mikulič. Malunak Anatola Harmazy
Nadzieja dakładna nia viedaje, dzie mahła zarazicca.
— Muž chadziŭ na pracu, jeździŭ u metro, u hramadzkim transparcie. Moža, jon byŭ nośbitam. A moža, u haściach atrymała, bo ja nie adzin raz była ŭ haściach. Usie tam zdarovyja byli, ale adna žančyna z toj kampanii, dzie my byli, ciapier znachodzicca ŭ reanimacyi ŭ hetym ža 6-m špitali, jak i jaje muž. Ci jana muža zaraziła, ci muž jaje zaraziŭ. Jana zachvareła 21 sakavika, a ja — 23 sakavika. A ŭ haściach my byli 18 sakavika. Ja jašče adpracavała 21 sakavika kancert u sanatoryi ŭ Ŭździenskim rajonie. Tady adčuvała siabie dobra. A potym uźniałasia temperatura, była słabaść, spać chaciełasia ŭvieś čas. Mlavaść i abyjakavaść. Usie symptomy drennyja.
Nadzia Mikulič kaža, što jana aścierahałasia karanavirusu, adčuvała niebiaśpieku.
— Ja nikudy nie chadziła, tolki vyhulvała sabačku. Na poštu muža dasyłała pasyłku zabrać. U kramu nie chadziła. Praź internet zamaŭlała. Ja imknułasia mocna nie kantaktavać ź ludźmi. Kali na vulicy sustrakalisia z sabačnikami, była na adlehłaści, papiaredžvała, što ŭ mianie temperatura i ja nia viedaju, što ŭ mianie.
Śpiavačka kaža, što razam ź joj lažać usie ludzi, chvoryja na karanavirusnuju infekcyju.
— Tut, napeŭna, špital specyjalizavany. Maju susiedku pa pałacie ŭ 2 špitali taksama siudy pieravieźli, bo my razam lažali. Potym i ŭ jaje karanavirus znajšli. Ja i jaje zaraziła. Takaja voś historyja. U majoj pałacie lažyć žančyna, jakuju pryvieźli z 3-ha špitalu, i babulka, jakuju ŭčora z sanatoryja «Praleska» pryvieźli ŭnačy.
Usie my izalavanyja. Usie pałaty zakrytyja, nichto ni ź kim nie kantaktuje. Vyjści možna ŭ tualet ci duš. Tut ahulnyja duš i tualet, u pałatach niama. Medsiostraŭ nie dačakajeśsia, daktaroŭ nie dačakajeśsia. Nikoha niama na paviersie ŭvohule. Tam, dzie pavinna siadzieć medsiastra, lažyć zapiska ź jaje telefonam, kab, kali patrebna, pazvanić. Była prablema, kali babuli stała drenna z sercam, my pazvanili medsiastry, i jana pryjšła praz 40 chvilinaŭ. Tut pamreš i nie dačakajeśsia doktara i medsiastry. Jany zrobiać svaju spravu i ŭciakajuć… Spačatku nie chacieła pra heta raskazvać, a potym usio ž vyrašyła raskazać…
