Volha Łahvinovič z Maładečna bolš za 3 tydni damahałasia testu na karanavirus. «Niama padstavaŭ», — adkazvali lekary. Ciapier COVID-19 u jaje paćvierdziŭsia, u muža dvuchbakovaja pneŭmanija, dvoje dziaciej kašlajuć. Siamja čakaje, kali ŭsim čaćviarym znojduć miesca dla špitalizacyi, piša Radyjo Svaboda.
Fota Nadziei Bužan.
U mienskija špitali maładačanskuju siamju nie pakładuć, niahledziačy na toje, što dniami Alaksandar Łukašenka zajaviŭ: chvoryja na karanavirus pavinny lačycca ŭ abłasnych špitalach, a nie ŭ rajonnych.
«Miensk nas brać nia choča. Prapanavali Vałožyn, ale tudy my sami nia chočam, tam nia vielmi dobra abstalavany špital, reputacyja ŭ jaho tak sabie — niama kamputarnaj tamahrafii, a ja bajusia za dziaciej. Nia viedaju, čamu nas u rodnaje Maładečna nie kładuć — moža, špitali ŭžo zabityja pad zaviazku. Ciapier siadzim doma i čakajem, dzie nam znojduć miesca», — kaža Volha, jakoj 20 krasavika paviedamili, što ŭ jaje stanoŭčy test na karanavirus.
Kiepska adčuvać siabie Volha pačała jašče 29 sakavika — padniałasia temperatura, zabaleła horła. Temperatura nie spadała, žančyna pačała zadychacca. 6 krasavika jaje pakłali ŭ pulmanalohiju Maładačanskaha špitala.
«Renthien ničoha nie pakazvaŭ. Ja prasiła zrabić test, mnie kazali: niama padstaŭ. Mianie «pakapali» 4 dni i adpuścili, nibyta symulantku. Balničny zakryli 10 krasavika. Doma stan nie palepšyŭsia, stała horš. Ja patelefanavała hałoŭnamu doktaru, patłumačyła, što temperatura nie spadaje, choć źmianiła ŭžo niekalki antybijotykaŭ. Tady ŭžo mianie nakiravali ŭ terminovym paradku ŭ Žodzina, bo ŭ Maładečnie špitali pierapoŭnienyja», — kaža Volha.
Na mašynie chutkaj dapamohi 17 krasavika jaje pavieźli ŭ Žodzinski špital. Pakul jana siadzieła ŭ pryjomnym pakoi, padvozili i padvozili ludziej z pneŭmanijami z Červienia i Stoŭpcaŭ.
«Mnie niekalki razoŭ rabili renthien — jon ničoha nie pakazvaje, analiz kryvi narmalny. Doktarka zapadozryła, što ŭ mianie niedalečany branchit, i kaža: «Moža, vam pakul kłaścisia nia varta, tut usio ciažkimi pneŭmanijami zabita».
U Žodzinie mnie narešcie zrabili test na karanavirus. Mnie niezrazumieła, čamu try tydni mnie admaŭlali, i naahuł — kamu i pa jakich pakaźnikach adrazu robiać testy? Kožny dzień pa televizary čuju, što pa kolkaści praviedzienych testaŭ Biełaruś «napieradzie planety ŭsioj».
Paśla zdačy testu Volha pajechała ŭnačy dadomu z Žodzina ŭ Maładečna (120 km) na taksoŭcy.
20 krasavika ŭ muža Volhi rezka padniałasia temperatura — da 39 hradusaŭ, usio cieła łamiła.
«A jon naahuł nia viedaje, dzie paliklinika, prachodzić pa 50 km u dzień, — kaža Volha. — Vyklikali ŭčastkovuju doktarku, taja pasłuchała, ničoha nie pačuła».
A ŭ 22 hadziny Volzie patelefanavali z sanstancyi i paviedamili, što ŭ jaje stanoŭčy test na COVID-19.
«Siońnia nas abodvuch pavieźli ŭ Vialejku, zrabili KT. U muža — pneŭmanija. Napisali: «KT-karcina moža adpaviadać dvuchbakovaj interstycyjalnaj pneŭmanii, nie vyklučajučy COVID-19». Test na karanavirus jamu nie zrabili.
Ciapier my siadzim doma ŭ Maładečnie, čakajem, kudy nas špitalizujuć usioj siamjoj. U mianie lohkaja stupień «karony» — bolš za 3 tydni temperatura 37,2. U muža dvuchbakovaja pneŭmanija. Dzieci taksama nie zusim zdarovyja: 10-hadovaja dačka kašlaje, u 14-hadovaha syna — nievialikaja temperatura», — kaža žančyna.
Naturalna, Volha nia raz zadumvałasia, adkul u jaje karanavirus. Kaža, što ŭvieś sakavik, kali sytuacyja ŭ Biełarusi pahoršyłasia, siamja starałasia abmiežavać koła kantaktaŭ. Dzieci ŭ škołu nie chadzili, jana pracavała za kamputaram doma, vychodziła tolki pa nieabchodnaści — u bližejšuju kramku, pa pracy vyjaždžała na sustrečy, ale na paru chvilin, trymałasia na adlehłaści. Kantakty sa svajakami taksama abmiežavali.
«Ja sama ŭ šoku, nia viedaju, dzie mahła padčapić virus. Moža, kali ja ŭ pulmanalohii lažała — z 6 pa 10 krasavika. Ale tudy ja pajechała ŭžo z symptomami, zadychałasia, nie mahła prakašlacca. Mianie vielmi niepakoić, što ja kantaktavała ź vialikaj kolkaściu lekaraŭ.
Doktar dva razy dadomu da nas prychodziŭ pry kancy sakavika — u zvyčajnaj marlevaj paviazcy. Treci raz, kali mnie horš stała, ja sama pajechała ŭ palikliniku, bo patelefanavała zahadčycy, što stan pahoršyŭsia, a taja skazała pryjaždžać. Dzicia zachvareła — prychodziła pedyjatarka taksama tolki ŭ marlevaj paviazcy. Potym pulmanalohija, ale tam daktary byli ŭ poŭnaj ekipiroŭcy.
Potym mianie vieźli ŭ Žodzina, ja doŭha znachodziłasia ŭ pryjomnym pakoi, tam nie mahli zrazumieć, što sa mnoj. Potym skazali, što mnie terminova treba da skivična-tvaravaha chirurha, i ja pajechała ŭ stamatalohiju. I ŭ asnoŭnym maje kantakty — heta daktary, pa jakich mianie haniali try tydni», — pieražyvaje za lekaraŭ Volha.
Atrymać aperatyŭna kamentar, čamu Volzie Łahvinovič try tydni admaŭlali ŭ praviadzieńni testa na karanavirus i kudy naahuł špitalizujuć siamju, u centralnym rajonnym špitali Maładečna Svabodzie nie ŭdałosia.
