Navukoŭcy ź niamieckaha Instytuta virusałohii i daśledavańniaŭ u halinie VIČ va Univiersitecie Bona ŭ vyniku daśledavańnia karanavirusa vyśvietlili, što praktyčna adziny sposab zarazicca — heta doŭhija i blizkija znosiny z chvorym na COVID-19. Pra heta zajaviŭ kiraŭnik instytuta Chiendryk Štrejek, piša rbc.ru.
Virusołahi na praciahu apošnich tydniaŭ praviali maštabnaje daśledavańnie ŭ niamieckim horadzie Chajnśbierh, dzie było vyjaŭlena bolš za 1,4 tys. chvorych na karanavirus i zafiksavana 46 śmierciaŭ.
Navukoŭcy nie zmahli znajści prykmiet žyvoha virusa na pavierchniach pradmietaŭ. «Kali my brali ŭzory z ručak dźviarej, telefonaŭ abo tualetaŭ, to nie zmahli na ich asnovie kultyvavać virus u łabaratoryi», — paviedamiŭ Štrejek.
U vyniku ŭ instytucie pryjšli da vysnovy, što vierahodnaść zachvorvańnia ad kantaktu z pradmietami vielmi małaja. «Surjoznyja ŭspyški infiekcyi zaŭsiody byli vynikam taho, što ludzi na praciahu doŭhaha pieryjadu času byli blizka adno da adnaho», — skazaŭ kiraŭnik niamieckaha instytuta.
Da padobnaj vysnovy raniej pryjšoŭ virusołah Kryścijan Drosten ź bierlinskaha ŭniviersiteta Charité. Jon zajaviŭ, što karanavirus vielmi adčuvalny da vysychańnia na pavietry. Tamu ledź nie adzinym sposabam zarazicca źjaŭlajecca kropielny šlach pry niepasrednym kantakcie z nośbitam infiekcyi.
Raniej u krasaviku hałoŭny pazaštatny epidemijołah Rasii Mikałaj Bryko zajaviŭ, što karanavirus u pavietry ŭ bolšaści vypadkaŭ hinie za paŭhadziny, maksimum — za try hadziny. Tamu jon nie moža pieramiaščacca ŭ pavietry i vyklikać masavaje zaražeńnie ludziej. Bryko rastłumačyŭ, što virus pieradajuć adno adnamu ludzi.
