Telekanał ANT prakamientavaŭ vypadak z zapisam pieradačy «Naša ranica», padčas jakoj udzielnicu Volhu Mželskuju paprasili nie zhadvać u efiry imia nobieleŭskaha łaŭreata Śviatłany Aleksijevič.
— Abmiarkoŭvali źmiest budučaha siužetu. Mianie paprasili nazvać žančyn, jakija natchniajuć. Ja nazvała siarod ich Śviatłanu Aleksijevič. Mianie paprasili nazvać inšuju hierainiu, bo redakcyjnaja palityka nie prapuścić Aleksijevič, — raspaviała «Našaj Nivie» ŭdzielnica pieradačy Volha Mželskaja.
Biełaruskaja asacyjacyja žurnalistaŭ źviarnułasia pa kamientar da pres-sakratara ANT Iryny Rambalskaj.
— Kali ŭvažliva prahladzieć efir ANT abo zabić u pošukaviku na našym sajcie imia Śviatłany Aleksijevič, vy ŭbačycie, što Śviatłana časta zhadvajecca ŭ našych materyjałach. Bolš za toje, dva tydni tamu my zaprašali jaje ŭ adnu z hałoŭnych našych hramadska-palityčnych prahram «AbjektyŭNa» ź Dźmitryjem Bačkovym, na što atrymali admoŭny adkaz.
Imavierna tamu, što ŭ Śviatłany nie było mahčymaści pryjści ŭ hety dzień. Ale my zaŭsiody rady bačyć jaje ŭ nas u efiry i čakajem adkazu na zaprašeńnie. Možam zapeŭnić, što nijakaj redakcyjnaj palityki niama i być nie moža.
Što tyčycca kankretnaha vypadku, zaraz pravodzicca naša ŭnutranaje rasśledavańnie. My budziem rabić vysnovy paśla hutarki z kankretnym žurnalistam, — skazała pres-sakratar ANT sajtu BAŽ.
