Delfi.lt
Z 27 krasavika ŭ Litvie ŭstupaje ŭ siłu novy etap źmiakčeńnia karancinu — pry vykanańni peŭnych patrabavańniaŭ adkryjucca vuličnyja kafe, sałony pryhažości i muziei, dazvolena zajmacca sportam na vulicy, adkryjucca chramy, paviedamlaje Delfi.
Urad Litvy dazvoliŭ hetuju dziejnaść pry zachavańni žorstkich patrabavańniaŭ biaśpieki. U vuličnych kafe za adnym stolikam mohuć siadzieć nie bolš za dva čałavieki, stoliki pavinny stajać na adlehłaści dvuch mietraŭ. Uładalniki niekatorych kafe sumniajucca, što im varta adkryvać ustanovy, pakolki heta zapatrabuje niamała vydatkaŭ.
Kab palehčyć adnaŭleńnie dziejnaści kafe, Vilenski municypalitet daŭ kaviarniam mahčymaść karystacca parkami i skvierami ŭ centry stalicy.
Kulturnyja, zabaŭlalnyja, spartyŭnyja ŭstanovy taksama mohuć naviedvać hrupy nie bolš za dva čałavieki (vyklučeńni datyčacca členaŭ adnoj siam'i), ałe ŭ hetych ustanovach, jak i ŭ cyrulniaŭ, pavinna dziejničać praviła 10 kv. m na adnaho čałavieka.
Salaryi, masažnyja kabiniety, sałony tatu pakul nie buduć adčynienyja. Z paniadziełka dazvolena pravodzić ekzamieny na kiravańnie, zajmacca holfam, tenisam, stralboj na vulicy, adkryjuć kartadromy, zaaparki, bataničnyja sady — ale tolki tyja, što znachodziacca na vulicy.
Kanfierencyja biskupaŭ paviedamiła, što ad paniadziełka ŭ chramach štodnia, za vyklučeńniem niadzieli, buduć prachodzić słužby z udziełam ludziej, chramy buduć abmiažoŭvać kolkaść naviedvalnikaŭ. Z paniadziełka adkryjucca dziciačyja sady — jany prymuć dziaciej, čyje baćki pavinny vychodzić na pracu.
Karancin u Litvie dziejničaje da 11 maja.
Pa źviestkach Suśvietnaj mietryki, u Litvie za ŭvieś čas zafiksavana 1449 vypadkaŭ karanavirusa (u Biełarusi 10 463), dola tych, chto zachvareŭ, u susiedziaŭ u dva razy mienšaja.
U čaćvier zafiksavana 28 novych vypadkaŭ, u piatnicu 12, u subotu 16, u niadzielu — 16 (u Biełarusi učora 873, pierad hetym 817).
Za ŭvieś čas pamior 41 čałaviek
Najbolšaja kolkaść novych vypadkaŭ za dzień była 18 krasavika — 90 čałaviek.
