Šou pavinna praciahvacca, tamu tvorčyja kalektyvy i teatry pa ŭsim śviecie nie pierastajuć dzialicca svaimi pracami ŭ režymie anłajn. Na hetym tydni hladzim kamiedyi Maljera, kubinski tancavalny teatr, Kambierbetča ŭ roli Frankienštejna i šmat čaho inšaha.
Paniadziełak: «Škoła žonak» i «Mizantrop» Stefana Braŭnšviejha, teatr «Adeon» (Paryž)
Tydzień pačynajem z kamiedyi, pryčym nie aby jakoj. U čas pandemii «Adeon — Teatr Jeŭropy» pakazvaje na svaim «Vimeo» zapisy repiertuarnych śpiektaklaŭ i nazyvaje heta «Théâtre et canapé», to-bok «Teatr na kanapie». Hetymi dniami tut možna pahladzieć dźvie pastanoŭki kiraŭnika «Adeona» Stefana Braŭnšviejha — viadomaha režysiora, što staviŭ śpiektakli i opiery ŭ «Kamiedzi Fransez», Ła Skała i Bierlinskaj dziaržaŭnaj opiery. Braŭnšviejh viadomy aktualizacyjaj kłasiki, i hetaje jaho majsterstva jakraz možna acanić praz «Škołu žonak» i «Mizantropa» Maljera. Abodva śpiektakli supravadžajucca anhlijskimi subtytrami.
Dzie hladzieć: spasyłki dastupnyja na sajcie teatra.
Kali hladzieć: čym chutčej, tym lepš.
Aŭtorak: «Cieły» Sašy Valc, Šaŭbiunie (Bierlin)
Vostry, pravakacyjny i adzin z samych krutych teatraŭ «Šaŭbiunie», jakim kiruje suśvietna viadomy režysior i dekanstruktar kłasiki Tomas Astermajer, kožny dzień tranśluje videapaviedamleńnie i pakazvaje svaju pastanoŭku anłajn. Paniadziełak — vychadny, a ŭ aŭtorak prahrama pačynajecca z zapisu «Ciełaŭ» viadomaj u Hiermanii chareohrafki Sašy Valc, paplečnicy Astermajera, a siońnia dyrektarki Dziaržaŭnaha baleta Bierlina.
Paśla, kali sačyć za prahramaj, možna pahladzieć i Pitera Štajna, pad kiraŭnictvam jakoha «Šaŭbiunie» ŭ svoj čas pierajšoŭ na novy etap raźvićcia i vypracavaŭ ułasny styl, i samoha Tomasa Astermajera. Kiraŭnik teatra na hetym tydni budzie pradstaŭleny svajoj pastanoŭkaj skandalnaj pjesy «Padarvanyja» brytanskaj scenarystki Sary Kiejn. Teatr papiaredžvaje, što nie kožny sa svaich anłajn-pakazaŭ moža supravadzić subtytrami.
Dzie hladzieć: spasyłki šukajcie na sajcie teatra.
Kali hladzieć: videapaviedamleńnie idzie z 19 da 19.30 pa biełaruskim časie, zapisy śpiektaklaŭ dastupnyja z 19.30 da hadziny nočy.
Sierada: «1984» pavodle Džordža Orueła, «Paŭnočny balet» (Lids, Vialikabrytanija)
Hetaj pastanoŭkaj, jakaja «pašyraje miežy sučasnaha baleta», trupa abiacaje pieraviarnuć naša ŭjaŭleńnie pra hety vid mastactva. Stvorany chareohrafam i tancoram Džonatanam Uotkinsam «1984» pakazvaje, jakim balet moža być siońnia. Tym bolš pryciahalna ŭbačyć, jak u tancy ŭvasablajecca znakamitaja antyŭtopija Džordža Orueła, dzie hałoŭny hieroj Uinstan Śmit žyvie pad pilnym pozirkam Vialikaha Brata, ale ŭrešcie ryzykuje zakachacca i pasprabavać usio źmianić.
Dzie hladzieć: na sajcie teatra.
Kali hladzieć: da 2 maja.
Čaćvier: «Frankienštejn», Karaleŭski Nacyjanalny teatr (Łondan)
Karaleŭski Nacyjanalny teatr hatovy biaspłatna pakazać svoj chit — pastanoŭku «Frankienštejn» pavodle ramana Mery Šelli, u jakoj Bieniedykt Kambierbetč i Džoni Li Miler pa čarzie ihrajuć to stvaralnika, to stvareńnie. Uvasobleny režysioram Deni Bojłam — vy možacie viedać jaho, naprykład, pa filmach «Na ihle» albo «Miljanier z truščob» — śpiektakl vyklikaŭ absalutnaje zachapleńnie publiki i hadami paśpiachova išoŭ u prajekcie Theatre HD. Tym samym, što pakazvaje tranślacyi i zapisy teatralnych pastanovak na vialikim ekranie. Fiška z abmienam rolami pamiž dvuma vybitnymi akciorami prymušaje adkryć dva varyjanty «Frankienštejna», kab ubačyć najvyšejšy akciorski piłataž i vybrać dla siabie, chto ŭ jakoj roli hladzicca lepš. Teatr zrobić dastupnymi da prahladu abodva śpiektakli.
Dzie hladzieć: spasyłki šukać na sajcie teatra.
Kali hladzieć: z Kambierbetčam u roli Frankienštejna z 30 krasavika da 7 maja; z Džoni Li Mileram u roli Frankienštejna — z 1 da 8 maja.
Piatnica: «24 hadziny i sabaka», Malpaso Dance Company (Havana)
Piatnicu addajom sučasnamu tancavalnamu teatru, u pryvatnaści Kubinskamu kalektyvu Malpaso Dance Company, jaki z času svajho stvareńnia ŭ 2012 hodzie staŭ u siabie na radzimie adnoj z samych zapatrabavanych tancavalnych trup. Malpaso daje darohu maładym kubinskim tvorcam, a taksama supracoŭničaje ź mižnarodnymi chareohrafami, nabirajučy bały na karyść svajoj mižnarodnaj reputacyi. Kalektyŭ paśpiachova vystupaje na zamiežnych placoŭkach, ale pieršym za miežami Kuby jaho pakazaŭ Teatr Džojs, adzin z centraŭ sučasnaha tanca ŭ Ńju-Jorku. Ułasna Teatr Džojs i ŭklučyć adnu z pastanovak Malpaso Dance Company anłajn — heta budzie «24 hadziny i sabaka» pad muzyku ŭładalnika Hremi Artura O'Faryła.
Dzie hladzieć: spasyłku šukać na sajcie Teatra Džojs.
Kali hladzieć: 1 maja a siomaj pavodle ńju-jorkskaha času i a druhoj hadzinie nočy pavodle biełaruskaha času.
Subota — «Karol Lir» Uładzimira Ščerbania, Biełaruski Svabodny teatr
Toj samy śpiektakl, dziakujučy jakomu šekśpiraŭskija piersanažy na šekśpiraŭskaj scenie zahavaryli pa-biełarusku — premjera «fars-nuarnaha» śpiektakla «Karol Lir» u dramaturhičnaj apracoŭcy Mikałaja Chalezina i pastanoŭcy Uładzimira Ščerbania adbyłasia ŭ 2012 hodzie ŭ łondanskim teatry «Hłobus». Pa słovach vidavočcaŭ, trupa tady vychodziła na pakłon da publiki siem razoŭ.
Svabodny teatr piša, što pry stvareńni sučasnaha Lira abapiraŭsia na ŭłasny dośvied «tyranii i vyhnańnia», a sama historyja Karala Lira ŭtrymlivaje ŭ sabie paraleli ź biełaruskaj historyi.
Dzie hladzieć: na YouTube-kanale teatra.
Kali hladzieć: a 19 hadzinie 2 maja.
Niadziela: Kancert hruzinskaha ansambla «Erysijoni»
Adzin ź viadučych u Hruzii i, napeŭna, adzin z najvyklučniejšych u śviecie ansambl pieśni i tanca «Erysijoni» ŭ čas pandemii vykłaŭ u ahulny dostup svoj kolišni kancert, a heta pyšnyja kaściumy, virtuoznaja instrumientalnaja muzyka, šmathałosyja śpievy, tancy i imitacyja pajadynkaŭ. To-bok usio toje, čym stvorany ŭ 1885 hodzie «Erysijoni» skaraŭ i skaraje publiku pa ŭsim śviecie.
Dzie hladzieć: na Facebook-staroncy ansambla.
Kali hladzieć: kali zaŭhodna.
