Ruskaj słužbie Bi-bi-si stała viadoma mahčymaje imia adnaho z hałoŭnych fihurantaŭ spravy ab krušeńni «Boinha», što vykonvaŭ rejs MN17.
Hienierał-pałkoŭnik FSB Andrej Burłaka — mierkavany «Uładzimir Ivanavič». Fota bryanskobl.ru.
U materyjałach Abjadnanaj śledčaj hrupy (JIT), jakaja viadzie aficyjnaje mižnarodnaje rasśledavańnie padzieńnia samalota, hety čałaviek prachodziŭ pad psieŭdanimam «Uładzimir Ivanavič». Ludzi, što asabista mieli znosiny z hetym čałaviekam, skazali Bi-bi-si, što za imiem moža chavacca dziejny pieršy namieśnik kiraŭnika pamiežnaj słužby FSB Rasii hienierał-pałkoŭnik Andrej Burłaka.
U apublikavanych śledčymi telefonnych pieramovach pradstaŭniki samaabvieščanaj DNR pamiž saboj nazyvali Uładzimira Ivanaviča kamandziram usioj apieracyi na ŭschodzie Ukrainy. A były ministr abarony DNR Ihar Strałkoŭ zhadvaŭ, što padparadkoŭvaŭsia zahadam Uładzimira Ivanaviča.
Adna krynica, jakaja nazvała Bi-bi-si vierahodnaje imia «Uładzimira Ivanaviča», udakładniła, što paśla zaviaršeńnia aktyŭnaj fazy kanfliktu na ŭschodzie Ukrainy ŭ 2014—2015 hadach hienierał Burłaka atrymaŭ pavyšeńnie, a taksama najvyšejšuju dziaržuznaharodu — Hieroja Rasii.
Bi-bi-si nie ŭdałosia znajści ŭkaz ab prysvajeńni ŭznaharody, ale viadomyja vypadki, kali zvańnie prysvojvałasia zakrytym ukazam, jaki nikoli nie publikavaŭsia.
Z adkrytych krynic vynikaje, što da 2014 hoda Andrej Burłaka byŭ hienierał-lejtenantam, a paśla staŭ hienierał-pałkoŭnikam.
U telefonnych pieramovach pradstaŭnikoŭ DNR, pierachoplenych Słužbaj biaśpieki Ukrainy i dałučanych da materyjałaŭ spravy ab krušeńni MN17, Uładzimira Ivanaviča nazyvajuć «vialikim načalnikam, jaki prylacieŭ z Maskvy».
Andrej Ivanavič Burłaka naradziŭsia ŭ 1965 hodzie ŭ Savieckaj Havani (Chabaraŭski kraj). U 1986 hodzie skončyŭ pamiežnaje vučylišča, słužbu pačynaŭ na miažy ŭ Siaredniaj Azii. U 1995 hodzie skončyŭ Akademiju FSB, paśla čaho pracavaŭ kiraŭnikom apieratyŭnych padraździaleńniaŭ u Cichaakijanskim rehijanalnym pamiežnym upraŭleńni i ŭ Dalokaŭschodnim rehijanalnym upraŭleńni ŭ Chabaraŭsku. U kastryčniku 2007 hoda zahadam Uładzimira Pucina hienierał-major Burłaka byŭ pryznačany načalnikam Sachalinskaha pahraničnaha ŭpraŭleńnia FSB Rasii.
Paśla pracy na Sachalinie — pieravod u Maskvu, dzie jon užo ŭ zvańni hienierał-lejtenanta spačatku pracavaŭ načalnikam apieratyŭna-arhanizacyjnaha ŭpraŭleńnia pamiežnaj słužby FSB Rasii, a zatym staŭ namieśnikam kiraŭnika hetaha viedamstva.
Krynica Bi-bi-si, jakaja maje dostup da sistemy «Vyšuk-Mahistral» (tam zachoŭvajucca źviestki ab pierasoŭvańni hramadzian na ciahnikach, samalotach i aŭtobusach), ustanaviła daty pajezdak hienierała ŭ pieryjad z 2014 pa 2019 hod.
U 2014 hodzie, kali na ŭschodzie Ukrainy pačalisia bajavyja dziejańni, Andrej Burłaka jak minimum trojčy lotaŭ u Rastoŭ-na-Donie — horad, jaki ŭ toj momant pieratvaryŭsia ŭ hałoŭny pieravałačny punkt dla rasiejcaŭ, jakija chacieli ŭziać udzieł u bajavych dziejańniach na baku samaabvieščanych respublik.
16 abo 17 krasavika 2014 hoda (u hienierała byli nabytyja kvitki na abodva rejsy) Andrej Burłaka viarnuŭsia ŭ Maskvu ź pieršaj pajezdki ŭ Rastoŭ — dakładnaja data jaho pryjezdu Bi-bi-si nieviadomaja. Za niekalki dzion da hetaha, u noč z 11 na 12 krasavika, hrupa z 52 čałaviek na čale ź Iharam Strałkovym pierajšła rasijska-ŭkrainskuju miažu ŭ Danieckaj vobłaści i zachapiła Słaviansk.
Praz dva miesiacy, 17 červienia 2014 hoda, hienierał Burłaka znoŭ vylecieŭ z Maskvy ŭ Rastoŭ-na-Donie, a 20-ha viarnuŭsia nazad. Hetaja pajezdka adbyłasia nieŭzabavie paśla pieršaj asabistaj sustrečy Uładzimira Pucina z tolki što abranym tady prezidentam Ukrainy Piatrom Parašenkam ŭ Narmandyi.
Narešcie, 15 lipienia 2014 h. hienierał znoŭ vylecieŭ z Maskvy ŭ Rastoŭ-na-Donie. 17 lipienia nad Danieckaj vobłaściu byŭ źbity «Boinh» Małajzijskich avijalinij z 298 pasažyrami na borcie. Na nastupny dzień, 18 lipienia, Burłaka viarnuŭsia z Rastova ŭ Maskvu i bolš, jak vynikaje z danych, najaŭnych u rasparadžeńni Bi-bi-si, u 2014 hodzie ŭ Rastoŭ-na-Donie nie jeździŭ.
Jak raspaviała Ruskaj słužbie Bi-bi-si krynica, jakaja maje dostup da piersanalnych baz danych, ź sistemy «Vyšuk-Mahistral» paśla byli vydaleny ŭsie danyja ab pieralotach hienierała Burłaki za 2014 hod. Infarmacyju ab jaho pierasoŭvańniach krynicy Bi-bi-si ŭdałosia dastać z archiŭnaj kopii hetaj sistemy.
Maskva paśladoŭna admaŭlaje svoj udzieł u kanflikcie na paŭdniovym uschodzie Ukrainy. Pry hetym i šarahovyja bajcy, i aficery padraździaleńniaŭ DNR i ŁNR nieadnarazova kazali pra toje, što dapamoha z boku Rasii adyhryvała vyrašalnuju rolu ŭ pośpiechach armij samaabvieščanych respublik.
Abjadnanaja śledčaja hrupa, abapirajučysia na fota- i videaśviedčańni, a taksama pakazańni vidavočcaŭ, zaklučyła, što kompleks «Buk», jaki źbiŭ «Boinh» MN17, taksama prybyŭ na Danbas z Rasii. Pavodle najaŭnych źviestak, zienitna-rakietnaja ŭstanoŭka prajechała praz Rastoŭskuju vobłaść i pierajšła rasijska-ŭkrainskuju miažu ŭ miescy, nie padkantrolnym ukrainskim pamiežnikam.
Kali hienierał Andrej Burłaka i «Uładzimir Ivanavič» źjaŭlajucca adnym i tym ža čałaviekam, to Abjadnanaja śledčaja hrupa zmoža zrabić jašče adzin krok u rasśledavańni ŭsioj karciny taho, što adbyvałasia ŭ Danbasie ŭ lipieni 2014 hoda.
