Ułady Francyi płanujuć rabić nie mienš jak 700 tys. testaŭ na najaŭnaść karanavirusa siarod hramadzian paśla 11 maja, kali buduć pastupova zdymacca abmiežavańni, uviedzienyja praz pandemiju. Pra heta zajaviŭ premjer-ministr krainy Eduar Filip, vystupajučy ŭ aŭtorak u Nacyjanalnym schodzie Francyi, piša tass.ru.
«Kraina nie moža doŭhačasova znachodzicca ŭ stanie karancinu», — padkreśliŭ Filip. — U doŭhaterminovaj pierśpiektyvie heta pryviadzie da niehatyŭnych nastupstvaŭ dla Francyi. Moža adbycca krach ŭ ekanamičnaj śfiery». Taksama Francyja była vymušana zakryć svaje miežy, nahadaŭ jon.
Premjer adznačyŭ, što z času ŭviadzieńnia karancinu 17 sakavika ŭ krainie nie pracujuć škoły, ludzi nie majuć mahčymaści sustrakacca sa svajakami i siabrami.
Aceńvajučy pryniatyja miery, Filip padkreśliŭ, što samaizalacyja «stała efiektyŭnym mietadam» u baraćbie suprać epidemii karanavirusa. «Nam varta pačać vychad z karancinu», — zajaviŭ premjer. «Spad epidemii ŭžo pačaŭsia», — ličyć Filip.
Bolšaść kamiercyjnych pradpryjemstvaŭ u Francyi zmohuć znoŭ adkrycca pačynajučy z 11 maja, adnak restaranam i kaviarniam daviadziecca čakać jak minimum da pačatku červienia, zajaviŭ Eduar Filip.
Pavodle Hałoŭnaha ŭpraŭleńnia achovy zdaroŭja, kolkaść paćvierdžanych vypadkaŭ zaražeńnia karanavirusam u Francyi ad pačatku epidemii skłała 128 339, pamierli bolš za 23 tys. čałaviek.
