U niadzielu 17 maja na płoščy Lenina ŭ Breście prajšło tradycyjnaje karmleńnie hałuboŭ u znak pratestu suprać akumulatarnaha zavoda, jaki pabudavany za niekalki kiłamietraŭ ad horada. Pavodle infarmacyi bresckaha pravaabaroncy Ramana Kiślaka, u hety raz na płoščy sabrałasia kala 120 čałaviek, paviedamlaje Bresckaja hazieta.
Akcyja pratestu znoŭ prajšła biez łozunhaŭ. Chutčej za ŭsio, na heta paŭpłyvali masavyja zatrymańni aktyvistaŭ i vielizarnyja štrafy. Na minułym tydni šaściarych praciŭnikaŭ akumulatarnaha zavoda i dvuch pravaabaroncaŭ užo aštrafavali na 360 bazavych (9 720 rubloŭ), i heta jašče nie kaniec. Na nastupnym tydni jašče adbuducca sudy nad Ramanam Kiślakom i aktyvistam Valeram Faminskim (abodva ciapier na voli) i praciŭnikam zavoda Paŭłam Kinčakom, jaki byŭ zatrymany dniom 16 maja ŭ punkcie propusku «Kazłovičy» paśla prachodžańnia miažy i ciapier čakaje suda ŭ IČU.
Taksama 16 maja na ŭžo aštrafavanaha aktyvista Vitala Kazaka skłali pratakoł pa artykule 23.4. KaAP «Niepadparadkavańnie supracoŭnikam milicyi» pry jaho zatrymańni 8 maja.
Pavodle Kiślaka, za apošni čas akramia Kinčanka, Kazaka i jaho samoha byli zatrymanyja Siarhiej Piatruchin, Kanstancin Astapuk, Uładzimir Maroz, Dzianis Małyšenka, Aleh Viałaŭ, Valeryj Faminski, Uładzimir Vialičkin. Alaksandra Kabanava farmalna nie zatrymali, bo jon zachvareŭ i znachodzicca ŭ balnicy. Ale kala dźviarej jaho pałaty vystavili achovu z dvuch milicyjanieraŭ. Kiślak taksama ŭdakładniŭ, što ŭ jaho na hety momant 2 pratakoły: za 12 krasavika i 3 maja.
Akramia taho, 14 maja ŭ budynku suda była aznajomlenaja z pratakołam ab administracyjnym pravaparušeńni Ludmiła Karčeŭskaja, jaje nie zatrymlivali. Sprava ŭ dačynieńni da jaje budzie razhladacca 18 maja.
Z ulikam sutak da suda, vielizarnych štrafaŭ i taho, što bolšaść aktyvistaŭ paśla sudoŭ vieźli ŭ IČU znoŭ, heta samaja žorstkaja chvala cisku na ich za bolš čym dva hady pratestaŭ suprać akumulatarnaha zavoda. Na płatformie MolaMola 14 maja startavaŭ zbor srodkaŭ u padtrymku aktyvistaŭ.
Zatrymańni i sudovyja pracesy stali asnoŭnaj temaj abmierkavańnia ŭdzielnikaŭ akcyi pratestu.
«Ludzi aburanyja, ale, niahledziačy na represii, majuć namier damahacca kančatkovaha zakryćcia akumulatarnaha zavoda», — prakamientavaŭ situacyju «BH» Kiślak.
Paśla maŭklivaj akcyi pratestu ludzi pajšli pa centralnych vulicach Bresta da kinateatra «Biełaruś». Ab zatrymańniach nie paviedamlajecca.
