Hrodna staŭ pieršym horadam, kudy sa svajoj kamandaj pryjechaŭ pretendent u kandydaty na vybarach prezidenta Biełarusi, kiraŭnik sacyjał-demakratyčnaj partyi «Hramada» Siarhiej Čeračeń. U subotu jon zładziŭ pikiet pa zbory podpisaŭ, paviedamlaje Hrodna.life.
Čeračeń prapanuje biełarusam stvaryć novuju krainu dla žyćcia i adkryć jaje dla ŭsiaho śvietu. Stvaryć umovy dla raźvićcia małoha i siaredniaha biznesu, a taksama viarnuć biełarusam padtrymku i abaronu dziaržavy.
«Ja šmat padarožničaŭ, časta pravodžu pieramovy z partniorami i adnadumcami i baču, jak ludzi žyvuć u inšych krainach. A što ŭ nas? Sacyjalnyja harantyi mizernyja, finansavaja niespraviadlivaść i mnohaje inšaje, što nieabchodna mianiać i palapšać. Pa pracy ja štodnia sutykajusia z mnostvam pytańniaŭ, jakija treba vyrašać. A kolki ŭ nas niekampietentnych ludziej na kirujučych pasadach, niekatoryja ź ich stvarajuć bačnaść pracy. A bo tak być nie pavinna».
Ci hatovaja Biełaruś da pieramienaŭ?
Siarhiej Čeračeń ustupaje ŭ prezidenckuju kampaniju z devizam: «Evalucyja ułady — naš šlach raźvićcia dziaržavy». Tolki mocnaja ekanomika krainy źjaŭlajecca asnovaj sacyjalnych harantyj i mahčymaściaŭ.
«Biełaruś hatovaja da pieramienaŭ, ale našy ludzi ciapier u peŭnaj apatyi. Biełarusam treba pakazać, što siońnia jość kalektyvy i kamandy, jakija mohuć uziać na siabie adkaznaść za budučyja pieramieny. A jany chutka nastupiać, ja ŭ hetym upeŭnieny. My žyviom nie ŭ izalacyi, i ludzi bačać, jak možna žyć nasamreč. Rana ci pozna pieramieny nastupiać, ale kab jany byli nie chaatyčnyja, a stroha strukturavanyja, pavinny być ludzi, jakija pavinny ŭziać na siabie adkaznaść».
