Pabačyŭ śviet pieršy tom biełaruskaha bijahrafičnaha almanachu «Asoba i čas». Falijant na 500 staronak, vypuščany vydaviectvam «Limaryus», źmiaščaje materyjały,
pryśviečanyja jak asobam dobra viadomym, tak i tym, chto pakul što nia staŭ častkaj śviadomaści biełaruskaha hramadztva. Nieabchodnaść padobnaha vydańnia ŭ Biełarusi adčuvałasia daŭno, kaža ŭkładalnik knihi Alaksandar Fiaduta.
U dziaržaŭnych i chatnich archivach zachoŭvajecca šmat dziońnikaŭ, listoŭ, uspaminaŭ, jakija nikoli nie drukavalisia, ale majuć vialikuju kaštoŭnaść u stvareńni paŭnavartasnych partretaŭ ich aŭtaraŭ i adrasataŭ. Tak spadar Fiaduta pryjšoŭ da idei bijahrafičnaha almanachu. Tym bolš, što systematyčna ŭ Biełarusi hetym nichto nie zajmajecca.
«Treba dakumentavać nia tolki minuŭščynu, ale ž i toj čas, jaki zaraz. My ž žyviom u histaryčnyja časiny. Ludzi adychodziać, historyja spłyvaje — treba zafiksavać čas. Voś tak uźnikła hetaja ideja».
Na vokładku almanachu vyniesienyja fotazdymki Zośki Vieras, Mikałaja Malinoŭskaha, Vasila Bykava i Piatra Mašerava — asobaŭ z roznych kulturnych, histaryčnych i palityčnych słajoŭ hramadztva. Heta — pryncypovaja pazycyja składalnika.
«Pa‑pieršaje, kab tam nie byli adny piśmieńniki. Pa‑druhoje, pavinny być pradstaŭlenyja roznyja časy, pačynajučy ad Žyhimonta Staroha i da našych sučaśnikaŭ Bykava, Bryla, Mašerava, Zimianina. Pavinny być roznyja haliny žyćcia, mužčyny i žančyny, kamunisty i antykamunisty. Vyśvietliłasia, što ŭsio heta razam vielmi cikava čytać. Atrymałasia knižka, jakuju b ja abaviazkova nabyŭ, kab ja jaje nia mieŭ jak aŭtar i składalnik».
Almanach dźviuchmoŭny. Składalnik ličyć taki padychod całkam abhruntavanym.
«Sprava ŭ tym, što častka aŭtaraŭ z Rasiei i kab im była mahčymaść drukavacca, tamu što tam šmat dakumentaŭ, jakija tyčacca našaj ahulnaj historyi.
A pryncypovaja pazycyja taja, što pieršaja mova almanachu ŭsio ž taki biełaruskaja. Adzinaje, što my papiaredzili ŭsich, što heta sučasnaja biełaruskaja mova».
Almanach «Asoba i čas» pryśviečany pamiaci vydatnaha biełaruskaha daśledčyka historyi i litaratury prafesara Hienadzia Kisialova.
