Uviečary 23 vieraśnia ŭ centry Hrodna čałaviek, uciakajučy ad milicyi, skoknuŭ u Nioman. Kali jon pierapłyŭ raku, jaho zatrymali. Pra heta raspavioŭ Hrodna.life čytač Mikałaj, jaki staŭ śviedkam padziei.
«My ź siabram siadzieli na zadniaj častcy dramteatra. Ja źviarnuŭ uvahu, što ŭnizie stajali ludzi ŭ formie. Praź niekatory čas na terytoryju teatra padjechaŭ bus i zabraŭ niekalki amapaŭcaŭ, ale pry hetym niekalki jašče zastavalisia. Paśla hetaha ja źviarnuŭ uvahu na siłuet u Niomanie. Spačatku my ź siabram padumali, što čałaviek tonie. Jak potym akazałasia, jon prosta drenna płavaŭ».
Mikałaj adznačaje, što čałaviek kala 10 chvilin sprabavaŭ pierapłyści Nioman, a kali dapłyŭ da bieraha, jaho zatrymała milicyja.
«Padjechaŭ bus i pobač z busam biehła jašče 5-6 amapaŭcaŭ. I pakolki chłopiec byŭ užo źniasileny z-za chałodnaj vady i płyni, jon nie zmoh ad ich uciačy», — dadaŭ Mikałaj.
Čytačy Hrodna.life paznali ŭ im akciora Teatra lalek i muzyki Alaksandra Raćko.
Heta ŭžo druhi vypadak u vieraśni, kali hrodzieniec uciakaje ad milicyi ŭ race. 13 vieraśnia Viktar Kaściuk vyjšaŭ u centr Hrodna ŭ majcy z nacyjanalnaj simvolikaj i sa ściaham. Jaho pasprabavali zatrymać supracoŭniki milicyi. Jon vymušany byŭ uciakać i, kab vyratavacca ad pieraśledu, pierapłyŭ Nioman. Vybracca z raki Viktaru dapamahli vypadkovyja minaki. Jaho nie zatrymali.
