Pra heta Łukašenka raspavioŭ siońnia na naradzie ź siłavikami i kiraŭnikami abłaściej. Jaho cytuje BiełTA.
«Taja hramadzianka Biełarusi i chatniaja haspadynia Cichanoŭskaja siońnia zabyłasia, što prezident Biełarusi jaje vyratavaŭ».
Łukašenka raspavioŭ, jak u tyja dni vyklikaŭ da siabie poźnim viečaram staršyniu KDB Valeryja Vakulčyka i daručyŭ jamu «źniać z vulic samaje bajavoje padraździaleńnie i ŭziać pad kantrol štab apazicyi».
«Była zadača pieraapranuć našych chłopcaŭ z «Alfy» i ŭ toj ža čas, zaśviaciŭšysia tam, akuratna pakazać, što my ŭziali pad kantrol hety štab», — skazaŭ Alaksandr Łukašenka.
Na nastupny dzień [10 žniŭnia — NN], raspavioŭ kiraŭnik dziaržavy, Śviatłana Cichanoŭskaja paprasiłasia na pryjom da ministra ŭnutranych spraŭ, pra što Juryj Karajeŭ dałažyŭ prezidentu.
«Ja adpraviŭ tudy dvuch čałaviek: jaho pieršaha namieśnika i kiraŭnika AAC. U cełym prośba była adna: «Kali łaska, pieradajcie prezidentu, ja chaču źjechać ź Biełarusi: budzie biada».
My razumieli, što moža być biada. I ja addaŭ rasparadžeńnie: my pad achovaj, zhodna ź jaje žadańniem, ź ludźmi, pra jakija jana paprasiła, kab jaje supravadžali, vyvieźli ŭ Litvu da dziaciej.
I kali jana skazała, što ŭ jaje niama hrošaj, kab tam pražyć, ja rasparadziŭsia, i ź dziaržpradpryjemstva ŭziali 15 tysiač dalaraŭ i addali joj.
«Vialiki dziakuj vam», — płakała na šyi. Vyvieźli», — adznačyŭ Alaksandr Łukašenka.