Alaksandr Bohdan.
Śviatara z Vaŭkavyska Alaksandra Bohdana druhi raz za dva tydni abvinavačvajuć va ŭdziele ŭ niesankcyjanavanym masavym mierapryjemstvie. Milicyjanty zatrymali jaho nibyta dla apytańnia ab padpałach aŭtamabila i doma inśpiektara milicyi, jakija adbylisia 2 kastryčnika. Ale ŭ adździaleńni na ajca Alaksandra aformili pratakoł za ŭdzieł u žnivieńskim mitynhu, vusny dazvoł na jaki davaŭ staršynia rajvykankama. Ajciec Alaksandr vinu nie pryznaje, piša Hrodna.life.
«16 žniŭnia ŭ Vaŭkavysku byŭ mirny mitynh, na jaki vyjšła vielmi šmat ludziej. Za dva dni da hetaha mer daŭ dazvoł, i ŭsie razumieli, što nie toje, što bić nie buduć, nie buduć zatrymlivać. Ludzi išli sa spakojnaj sumleńniem, razumiejučy, što heta mirny mitynh i za heta ničoha nie budzie. Paźniej pravaachoŭniki ŭ internecie ŭbačyli fatahrafiju, na jakoj byŭ čałaviek, padobny na mianie», — raspavioŭ Alaksandr Bohdan dla Hrodna.life.
8 kastryčnika dvoje mužčyn zabrali Alaksandra Bohdana sa Śviata-Pietrapaŭłaŭskaha sabora ŭ Vaŭkavysku paśla słužby, skazaŭšy, što jany ź milicyi. Jaho advieźli ŭ RAUS na słužbovaj mašynie, byccam by dla taho, kab pahavaryć ab padpałach, jakija adbylisia ŭ Vaŭkavysku raniej. Tam ajciec Alaksandr pračakaŭ z paŭhadziny i vyrašyŭ syści. Tady lejtenant Dźmitryj Bojka skazaŭ jamu, što jon zatrymany, i na jaho zaviedzienaja administracyjnaja sprava.
Alaksandra Bohdana abvinavačvajuć va ŭdziele ŭ mitynhu 16 žniŭnia na padstavie fota i videa ź mierapryjemstva. «14 žniŭnia ludzi vielizarnym natoŭpam padyšli da budynka rajvykankama. Tady da ludziej na hanak vyjšaŭ mer i ŭsie čuli, što dadzieny dazvoł na mitynhi. Bojka rastłumačyŭ, što budzie papiera z rajvykankama, jakaja paćviardžaje, što ŭ toj dzień dazvołu na mitynh nie było», — raskazaŭ ajciec Alaksandr.
Pieršapačatkova Alaksandra Bohdana chacieli abvinavacić pa častcy 3 artykuła 23.34 — paŭtorny ŭdzieł u niesankcyjanavanym masavym mierapryjemstvie. Ale pieršaje papiaredžańnie za ŭdzieł u masavym mierapryjemstvie jon atrymaŭ 30 vieraśnia. Tady jaho sudzili za 13 vieraśnia, kali jon uskłaŭ kvietki ŭ pamiać ab zahinułym dyrektary vaŭkavyskaha muzieja. Bohdan padaŭ zajavu na pravierku matyvirovačnaj častki rašeńnia suda.
Z novym pratakołam Bohdan nie pahadziŭsia. Pa słovach ajca Alaksandra, pravy i abaviazki jamu patłumačyli ŭ samym kancy, nie dali prava na abaronu i nie pakazali zaklučeńnia fota i vidieaekśpiertyzy.
Paźniej abvinavačvańnie ŭ pratakole źmianili na častku 1 artykuła 23.34. Kopiju abnoŭlenaha pratakoła Alaksandru Bohdanu pasprabavali ŭručyć 10 kastryčnika. Zaŭvažyŭšy, što ŭ joj adsutničaje «nie» pierad słovam «zhodny», śviatar nie ŭziaŭ dakumient. Pavodle jaho słoŭ, toj zastaŭsia lažać na padvakońni pierad uvachodam u chram. Bolš sprobaŭ uručeńnia kopii pratakoła nie było. Ab usim tym, što adbyłosia, ajciec Alaksandr napisaŭ rapart ŭ jeparchiju.
Haradžanie ličać, što novyja abvinavačvańni — reakcyja milicyi na intervju śviatara «Jeŭraradyjo», raskazaŭ jon. U publikacyi jon tłumačyŭ, što 4 kastryčnika milicyja zatrymlivała ludziej i da, i adrazu paśla nabaženstva za Biełaruś. Pavodle UUS Hrodzienskaha abłvykankama, viernikaŭ zatrymlivali za toje, što paśla malebna jany pajšli ŭ centr horada ź simvolikaj i vykrykvali łozunhi.
Datelefanavacca ŭ Vaŭkavyskaje RAUS i atrymać kamientar Hrodna.life nie ŭdałosia.
