Pa stanie na ranicu 25 listapada ŭ Biełarusi 143 čałavieki pryznanyja palityčnymi źniavolenymi. Vykładčyca BDUIR — adna ź ich. Supracoŭniki KDB zatrymali jaje 12 listapada paśla pieratrusu ŭ jaje doma. Joj vystavili abvinavačańnie pa č. 1 art. 342 KK — «Arhanizacyja albo ŭdzieł u hrupavych dziejańniach, jakija hruba parušajuć hramadski paradak». Druhi tydzień Volhu trymajuć pad aryštam. Spring96.org parazmaŭlała z synam palitviaźniavolenaj Ivanam i raspaviadaje historyju Volhi.
Chto takaja Volha Fiłatčankava?
Volzie 41 hod, jana pracavała asistentkaj kafiedry «Prahramnaha zabieśpiačeńnia infarmacyjnych technałohij» u Biełaruskim dziaržaŭnym univiersitecie infarmatyki i radyjoelektroniki.
U Volhi dvoje dziaciej — siamihadovaja dačka i 18-hadovy syn Ivan. Jon vučycca ŭ hetym ža ŭniviersitecie, dzie pracuje jaho mama, tolki na inšym fakultecie — fakultecie infakamunikacyj.
Jak raspaviadaje Ivan, Volha šmat čym zachaplałasia ŭ volny ad pracy čas:
«Jana ŭsio žyćcio tančyć — heta ŭ nas siamiejnaje. Apošnija niekalki hadoŭ jana vyvučała nacyjanalnuju kulturu. Taksama jana cikaviłasia pryvatnymi dziciačymi sadami».
«Heta moža zakranuć kožnaha». Što viadoma pra hramadzianskuju pazicyju Volhi
26 kastryčnika ŭ Biełarusi pačałasia raniej anansavanaja nacyjanalnaja zabastoŭka. Jaje padtrymali mnohija ŭstanovy i rabotniki Biełarusi, u pryvatnaści studenty i vykładčyki. Volha Fiłatčanka, źjaŭlajučysia vykładčycaj BDUIR na fakultecie kampjutarnych sistem i sietak, taksama ŭziała ŭdzieł u zabastoŭcy. U hetym univiersitecie pieršapačatkova da strajku adkryta dałučylisia 38 vykładčykaŭ.
Pra svaju hramadzianskuju pazicyju Volha zajaviła ŭ sumiesnym videazvarocie vykładčykaŭ BDUIR suprać hvałtu. U im vykładčyca na biełaruskaj movie źviarnuła ŭvahu na palityčny pieraśled studenta 4-ha kursa ich univiersiteta, člena stačkama Dźmitryja Mazuru, jakoha za ŭdzieł u akcyjach pratestu pa artykule 23.34 KaAP u sukupnaści asudzili na 38 sutak aresta.
«Naš student Dźmitryj Mazura publična vykazaŭ svaju hramadzianskuju pazicyju ab tym, što nielha być abyjakavymi i što heta moža zakranuć kožnaha z nas. Vynik — 38 sodniaŭ aryštu», — kaža Volha ŭ videa.
Viadoma taksama, što Volha była niezaležnaj naziralnicaj za vybarami na hetaj prezidenckaj kampanii. Siłaviki pry pieratrusie zabrali ŭ jaje ŭsie dakumienty i zapisy, źviazanyja z hetym.
Syn vykładčycy Ivan nie moža dakładna skazać, čamu jana vyrašyła nazirać na hetaj prezidenckaj kampanii.
«Napeŭna, tamu što situacyja ŭžo zusim aburalnaja. Usio ž taki ŭłada pavinna mianiacca», — łakanična skazaŭ Ivan.
Volha, jak i mnohija ŭ našaj krainie, vystupała suprać hvałtu paśla žnivieńskaj padziej. Jana padpisałasia pad zvarotam biełaruskich navukoŭcaŭ ad 13 žniŭnia da ŭładaŭ z patrabavańniem nieadkładna spynić luby hvałt u dačynieńni da mirnych hramadzian i vyzvalić usich zatrymanych demanstrantaŭ i palitviaźniaŭ. Zvarot padtrymali bolš za dźvie tysiačy navukoŭcaŭ, vykładčykaŭ, supracoŭnikaŭ navukovych ustanoŭ Respubliki Biełaruś.
«Jašče paru chvilin — i jany b pačali łamać dźviery»
Volha Fiłatčankava była zatrymanaja supracoŭnikami Kamiteta dziaržaŭnaj biaśpieki 12 listapada paśla pieratrusu ŭ siabie doma. Ivan raspavioŭ, jak u ich doma prachodziŭ pieratrus:
«Pravodzili pieratrus troje nieviadomych apieratyŭnikaŭ i adzin staršy lejtenant KDB. U kvateru my ich upuścili sami, bo jašče paru chvilin — i jany b pačali łamać dźviery. Jany ŭžo vyklikali siłavuju hrupu, i kali my ich puścili, to jany telefanavali i kazali: «Usio, chłopcy, nie treba, my ŭvajšli».
Pieratrus adbyvaŭsia biazładna. Niezrazumieła było, jakija pryčyny dla pieratrusu. Z pastanovy nie było jasna, na jakich padstavach skłalisia zdahadki ab tym, što pa dadzienym adrasie mohuć być niejkija dakumienty. Pieratrus prachodziŭ biez advakata, bo jaje admovilisia puścić. Dy i naohuł pieratrus byŭ bolš padobny na ahlad z prychilnaściu. Jany nie pieravaročvali dom uvierch dnom, ale jak byccam šukali niešta kankretnaje. U vyniku kanfiskavali ŭsiu techniku: mamy i maju. Taksama zabrali mamin pracoŭny sšytak naziralnika i niejkija dakumienty z nahody nazirańnia na vybarach».
Samu Volhu zatrymali adrazu paśla hetaha pieratrusu. Skazali, što jaje viazuć prosta na hutarku, ale damoŭ jana nie viarnułasia.
Jaje źmiaścili ŭ SIZA KDB, a potym pieraviali ŭ SIZA-1 na vulicy Vaładarskaha. Volzie vystaŭlenaje abvinavačvańnie pavodle č. 1 art. 342 Kryminalnaha kodeksa — «Arhanizacyja albo ŭdzieł u hrupavych dziejańniach, jakija hruba parušajuć hramadski paradak». Sankcyja hetaj normy praduhledžvaje da troch hadoŭ pazbaŭleńnia voli. Miera strymańnia — utrymańnie pad vartaj. Adnak u čym kankretna abvinavačvajuć vykładčycu — nieviadoma.
U advakata Volhi, jak i ŭ mnohich inšych advakataŭ pa palityčnych spravach, uziali padpisku ab nierazhałošvańni.
23 listapada biełaruskaja pravaabarončaja supolnaść pryznała Volhu Fiłatčankavu palitźniavolenaj.
Adras dla listoŭ Volzie: SIZA-1, vuł. Vaładarskaha, 2, h. Minsk, 220030
