Zatrymańnie ŭ Miensku. Ilustracyjnaje fota.
Aktyvista anarchisckaha ruchu Ŭładzisłava Maščuka pieršy raz zatrymali 2 kastryčnika, kali jon vychodziŭ z aŭtobusa. U hety čas nie było ni akcyjaŭ, ni pikietaŭ, piša Svaboda.
Uładzisłavu prysudzili 15 sutak za ŭdzieł u niesankcyjanavanaj akcyi, choć nijakaj akcyi, pavodle jaho, pablizu nie było. Paśla pieršych adbytych sutak Uładzisłaŭ vyjšaŭ na volu — pra heta raskazała jahonaja siabroŭka Iryna (imia źmienienaje). Praz dva tydni jaho znoŭ zatrymali ŭ kaviarni, paśla taho jak chłopiec sustreŭ svaich siabroŭ kala Akreścina.
Zatrymańnie prajšło ŭ kaviarni Döner Kebab. Razam z Uładzisłavam tady zatrymali Marynu Kastylančanku, Alaksandra i Natallu, Maryju i Ŭładzimiera.
Uładzisłavu znoŭ prysudzili 15 sutak, adbyvać adpravili ŭ SIZA ŭ Baranavičach.
«U pratakole było zapisana, što jon udzielničaŭ u pikiecie. Nie było navat śviedak, prosta prykłali rapart», — kaža Iryna.
Usich, kaho zatrymali razam z Uładzisłavam, u tym liku žurnalistku Marynu Kastylančanku, asudzili na 15 sutak. Ale paśla terminu ludzi nia vyjšli na volu. Ich sudzili jašče raz. I znoŭ pa artykule 23.34.
17 listapada sud Baranavickaha rajonu asudziŭ Uładzisłava Maščuka na 15 sutak. Dla jaho heta ŭžo trecija «sutki». Maryi Kastylančancy prysudzili 15 sutak, Maryi i Natalli — 10 sutak, Uładzimieru i Alaksandru — 15 sutak.
Uładzisłaŭ Maščuk abviaściŭ haładoŭku na znak pratestu suprać takoha prysudu. Infarmacyju pra heta jamu ŭdałosia pieradać praz advakata na sudzie.
Pa słovach siabroŭki Ŭładzisłava, ciapier jon haładaje ŭžo bolš za tydzień, adčuvaje siabie kiepska.
«Śpiarša jamu nia vieryli, ale kali jon ledź nia straciŭ prytomnaść, miascovyja lekary ŭhavorvali jaho pajeści», — kaža jana.
Na volu Uładzisłaŭ maje vyjści 29 listapada.
