Niekatoryja biełaruskija banki na hetym tydni atrymali ad Nacbanka list z prośbaj zabiaśpiečyć padklučeńnie da rasijskaj sistemy «Siervis-biuro SPFS» — heta rasijskaja sistema pieradačy finansavych paviedamleńniaŭ, anałah mižnarodnaj sistemy SWIFT. Pra heta «Našaj Nivie» paviedamili krynicy ŭ bankaŭskaj śfiery.
Praz SWIFT pa zmoŭčańni pracujuć amal usie banki śvieta, ź jaho dapamohaj adbyvajucca tranzakcyi miž bankami ŭ viadučych valutach.
Adklučeńnie SWIFT — heta adna ź imaviernych, ale nie asabliva realnych sankcyj, pra jakija havorać praciŭniki režymu Łukašenki.
«U vypadku kali niejkija biełaruskija banki trapiać pad sankcyi, jakija abmiažoŭvajuć ich dostup da mižnarodnych sistem pieravodaŭ, jany zmohuć naładzić płaciažy praz banki Rasii», — ličyć ekanamistka Kaciaryna Barnukova, jakuju my paprasili prakamientavać inicyjatyvu rehulatara.
U samim Nacbanku «Našaj Nivie» adkazali, što ŭ Biełarusi zastałosia jašče niekalki niepadklučanych da SPSF bankaŭ.
«Siervis-biuro pieradačy finansavych paviedamleńniaŭ Banka Rasii na bazie AAT «Biełaruski mižbankaŭski raźlikovy centr», jakoje stvorana dla akazańnia bankam i niebankaŭskim kredytna-finansavym arhanizacyjam pasłuh pa pieradačy finansavych paviedamleńniaŭ farmata SWIFT nierezidentami Biełarusi, stvorana i ŭviedziena ŭ pramysłovuju ekspłuatacyju z 29 listapada 2019 hoda.
Na hety momant 7 biełarusich bankaŭ užo źjaŭlajucca karystalnikami «Siervis-biuro SPFS», 5 bankaŭ — na zaklučnym etapie padklučeńnia. Astatnija banki razhladajuć mahčymaści i ažyćciaŭlajuć acenku ŭnutranych resursaŭ i hatoŭnaści svaich sistem dla padklučeńnia da «Siervis-biuro SPFS», — skazali «Našaj Nivie» u pres-słužbie Nacbanka.
