Polskaja palicyja likvidavała nielehalnuju tytuniovuju fabryku, jakaja mahła vypuskać nie mienš za 10 młn cyharet u miesiac. Zatrymanyja siamiora čałaviek — dvoje hramadzian Polščy i piaciora hramadzian Biełarusi.
Jak udakładniajecca ŭ pres-relizie, nad hetaj spravaj užo doŭhi čas pracavali supracoŭniki ŭpraŭleńniaŭ u Hdańsku i Łodzi. Sabranaja infarmacyja pryviała ŭ Łodzinskaje vajavodstva, dzie na terytoryi arandavanaj pryvatnaj ułasnaści i znachodziłasia fabryka.
Padčas akcyi zatrymanyja siamiora čałaviek. Pry pieratrusie znojdzienyja i kanfiskavanyja prafiesijnaja technałahičnaja linija koštam kala 1 młn złotych, bolš za 1,8 młn štuk cyharet, rezany tytuń i nieabchodnyja dla vytvorčaści kampanienty.
Śledčyja miarkujuć, što na fabrycy da momantu jaje likvidacyi mahło być vyrablena niekalki dziasiatkaŭ miljonaŭ štuk cyharet. Kanfiskavanyja cyharety i rezany tytuń nanieśli b kaźnie škodu ŭ pamiery bolš za 2 młn złotych (prykładna $530 tysiač).
Zatrymanym mužčynam va ŭzroście ad 32 da 60 hadoŭ vystaŭlenyja abvinavačvańni va ŭdziele ŭ arhanizavanaj złačynnaj hrupie, vytvorčaści i zbycie padakcyznych tavaraŭ. Jany źmieščanyja pad vartu terminam na 3 miesiacy.