U milicyi rehijonu prakamientavali incydent u Navapołacku 20 śniežnia, kali paśla dziciačaha śviata na Płoščy Budaŭnikoŭ zatrymali Dzieda Maroza i inšych haradžan. U HAUS zabrali piać čałaviek, troje ź ich čakajuć suda, paviedamlaje gorod214.by.
— Milicyja atrymała infarmacyju ab zaklikach u telehram-kanałach da ŭdziełu žycharoŭ Navapołacka ŭ niesankcyjanavanym masavym mierapryjemstvie. U miescy mierkavanaha zboru prysutničali ludzi, jakija nieadnarazova pryciahvalisia za parušeńnie zakanadaŭstva ab masavych mierapryjemstvach, u tym liku jakija paznačyli siabie pratestnaj atrybutykaj, — paviedamiła aficyjny pradstaŭnik UUS abłvykankama Volha Škuratava.
Piać čałaviek dastavili ŭ HAUS dla razboru. U dačynieńni da traich skłali pratakoły pa artykule 23.34 KoAP — za raniej učynienyja pravaparušeńni. Dvaich adpuścili paśla vyśviatleńnia asoby. Astatnija zatrymanyja da suda.
Nahadajem, 20 śniežnia ŭ Navapołacku zatrymali dvuch mužčyn paśla dziciačaha śviata kala hałoŭnaj haradskoj jołki. Adnaho ź ich — Uładzimira, jaki vykonvaŭ rolu Dzieda Maroza — paźniej adpuścili, a dacenta Połackaha dziaržuniviersiteta Viktara Jakubava pakinuli ŭ HAUS. U śpisach pravaabaroncaŭ čatyry čałavieki, jakich zatrymali ŭ Navapołacku 20 śniežnia.
Paśla dziciačaha śviata ŭ Navapołacku prajšli zatrymańni. U HAUS apynuŭsia navat Dzied Maroz
