Hetak vynikaje sa spravazdačy Centra ekanamičnych i dziełavych daśledavańniaŭ (CEBR), jaki bazujecca ŭ Vialikabrytanii, piša VVS. Kitaj u 2028 hodzie, na piać hadoŭ raniej mierkavanaha terminu, pierahonić Amieryku i stanie viadučaj ekanomikaj śvietu.
Hetamu, na dumku analitykaŭ, spryjajuć efiektyŭnyja dziejańni kitajskich uładaŭ pa baraćbie z pandemijaj.
Jany taksama adznačajuć, što paśla adkatu, vyklikanaha karanavirusam, Indyja da 2030 hoda pa ekanamičnych pakazčykach vyjdzie na treciaje miesca ŭ śviecie. A Rasija da 2035 hoda moža ŭvajści ŭ pieršuju dziasiatku, nie ŭ apošniuju čarhu dziakujučy niedaacenienamu ciapier, ale dosyć mahutnamu IT-siektaru.
Niahledziačy na toje, što Kitaj pieršym trapiŭ pad udar COVID-19, epidemiju tam udałosia ŭziać pad kantrol dziakujučy chutkim i žorstkim mieram, tamu kitajcam nie spatrebilisia dadatkovyja łakdaŭny, jakija paralizavali Jeŭropu i nanieśli ciažki ŭdar pa jaje ekanomicy.
U vyniku Kitaj paźbieh u adychodziačym hodzie ekanamičnaha spadu i navat zafiksavaŭ rost u 2%.
Na hetym fonie amierykanskaja ekanomika pieraniesła kudy bolš ciažkija ŭzrušeńni, epidemijałahičnyja pakazčyki tam akazalisia adnymi z samych horšych u śviecie.
Ekanamičny ŭron zbolšaha byŭ kampiensavany manietarnaj palitykaj i vializnymi padatkovymi lhotami, adnak z-za palityčnych roznahałośsiaŭ kala 14 młn amierykancaŭ u novym hodzie mohuć zastacca biez dapamoh pa biespracoŭi.
Spravazdača pradkazvaje, što paśla rezkaha ažyŭleńnia ŭ 2021 hodzie ŭ suviazi sa skančeńniem pandemii amierykanskaja ekanomika ŭ 2022-24 hadach budzie raści na 1,9%, a zatym rost zamarudzicca da 1,6%.
A voś ekanomika Kitaja pakaža štohadovy rost u 5,7% až da 2025 hoda, i tolki paśla hetaha trochi zamarudzicca da 4,5% u 2026-2030 hodzie.
Dola Kitaja ŭ suśvietnaj ekanomicy ŭžo padskočyła z 3,6% u 2000 hodzie da 17,8% u ciapierašnim, i kali vieryć aŭtaram spravazdačy, da 2023 hoda Kitaj patrapić u šerah ekanomik z vysokim prybytkam.
Zrešty, siaredni kitajec u finansavym płanie pa-raniejšamu budzie biadniejšy za siaredniaha amierykanca, kali ŭličyć, što nasielnictva krainy ŭ 4 razy bolšaje, čym u ZŠA.
