Televiadučaja Hanna Ejsmant adreahavała na rasśledavańnie «Bajpoła» pra śmierć Ramana Bandarenki.
Siastra staršyni BT śćviardžaje, što jaje nie było na miescy padziej na płoščy Pieramien:
«My, viadoma, za apošni hod sutyknulisia z takim patokam chłuśni, što jašče niadaŭna takoje ciažka było navat ujavić. Nie hrebavali ničym, až da pramoj falsifikacyi. Ale ŭsiamu pavinna być miera. Siońnia ja chaču zajavić — 11 listapada 2020 hoda ja była ŭ žyvym efiry «Panaramy» (taho tysiaču paćviardžeńniaŭ, pry žadańni zmoža znajści kožny) i nie mahła fizična brać udzieł ni ŭ jakich akcyjach. Mnie heta dakazać — prosta elemientarna, ale što rabić inšym ludziam, u dačynieńni da jakich taksama nachabna sfalsifikavanyja źviestki. Možna było b pajści ŭ sud. Ale kaho sudzić? Zdradnikaŭ, jakija siadziać u Polščy?» — napisała jana ŭ instahramie.
Ale što śćviardžaje «Bajpoł»? Što numar Hanny Ejsmant byŭ zafiksavany ŭ 22:43 na vulicy Ščadryna (heta kala płoščy Pieramien). A ŭ 22:45 byŭ uvachodny zvanok na jaje numar, na jaki jana nie adkazała.
«Panarama» ž, pavodle raskładu, vychodzić u efir u 21:00—21:45. Naviny sportu trochi zatrymlivajucca, kankretna 11 listapada Ejsmant była ŭ efiry ŭ 21:55-22:07.
Takim čynam, padziei pa časie nie pierasiakajucca.