Pratesty ŭ Rasii nie byli vyklikanyja pratestami ŭ Biełarusi, tam byli ŭnutranyja pryčyny. Ale, biezumoŭna, pratesty ŭ Biełarusi natchnili apazicyjna nastrojenych rasijcaŭ vychodzić.
Nie vyklučana, što dalej pratesty raspaŭsiudziacca na inšyja postsavieckija krainy, skažam, na Kazachstan.
Ciapierašnija pratesty ŭ Rasii ja b paraŭnoŭvaŭ chutčej z našymi «antydarmajedskimi» pratestami 2017 hoda, čym z našymi letašnimi i ciapierašnimi.
Biełaruś upieršyniu ŭ historyi nie natchniajecca niečym prykładam, a natchniaje inšyja narody i źjaŭlajecca ŭzoram dla ich.
U Rasii na pratestach nie ŭźnimali ni armianskich, ni kirhizskich ściahoŭ, a bieł-čyrvona-bieły ściah padymajuć.
* * *
U Biełarusi adbyŭsia narodny ŭzdym, jaki išoŭ źnizu, a nie źvierchu.
Nijakaj zamiežnaj inśpiracyi ŭ ich nie było, jak nie było i lidaraŭ, vyklučna dziela jakich ludzi vychodzili na vulicu.
Vyłučeńnie Cichanoŭskaj, Capkały, Babaryki było tryhieram, šturškom, ale nie pryčynaj i nie ruchavikom pratestaŭ.
U biełaruskich pratestach nie było «pravadyryzmu».
Biełaruskaje hramadstva nie nastrojenaje na hvałtoŭnyja mietady baraćby za svaje pravy, jano nastrojenaje i viasnoj praciahvać mirnyja pratesty. Ale ŭłady robiać takoje, što narod moža i ŭziacca za kały.
* * *
Palityčnaja revalucyja — heta praces, jaki pryvodzić da kardynalnych źmien u dziaržaŭnym ładzie.
My spadziajomsia, što ŭ nas budzie nie jak va Ukrainie ŭ 2004-m, dzie padzieju hučna nazvali revalucyjaj, a potym vyśviatlalisia, što ŭ tamtejšaj sistemie ničoha nie pamianiałasia, i spatrebiŭsia jašče adzin Majdan.
Ale jość i revalucyja, jakaja adbyvajecca ŭ sercach i hałovach, revalucyja śviadomaści. I ŭ hetym sensie ŭ Biełarusi revalucyja adbyłasia.
Narod letaś staŭ inšym, jon abjadnaŭsia. Ciapier bolšaść hramadstva choča demakratyi. Tamu, kali tolki sydzie Łukašenka, tak, «jak ciapier», u lubym vypadku nie budzie.
