«Homielskaja viasna»
Spravu razhladaje sudździa Siarhiej Karmanovič. Paciarpiełaja pa spravie — supracoŭnica AUS Centralnaha rajona Homiela Natalla Sinkievič.
Pavodle abvinavačańnia, 15 listapada ŭ Homieli padčas pratestaŭ Dźmitryj Cimašenka ŭdaryŭ pa ruce supracoŭnicu milicyi Natallu Sinkievič, jakaja zdymała na telefon pratestoŭcaŭ. Telefon upaŭ i raźbiŭsia. Materyjalnaja škoda składaje 800 rubloŭ. Svaimi dziejańniami Dmitryj Cimašenka ŭčyniŭ złačynstva pa art. 364 Krymilnaha kodeksa — «Hvałt ci pahroza hvałtu ŭ dačynieńni da supracoŭnika MUS».
18 listapada chłopca zatrymali i ŭziali pad vartu.
Na sud pryjšli kala 20 słuchačoŭ.
Padčas pracesu Dźmitryj Cimašenka raspavioŭ, što 15 listapada hulaŭ pa horadzie i pajšoŭ u bok cyrka. Kala fantana było šmat ludziej, jakija išli ad cyrka da tanka. Na prystupkach cyrka chłopiec spyniŭsia, tamu što trapiŭ na kamieru supracoŭnicy milicyi.
«Ja spužaŭsia, što ŭ dalejšym budu pryciahnuty da administratyŭnaj adkaznaści pa 23.34 KaAP. Ja pasprabavaŭ vybić rukoj telefon u supracoŭnicy. Celiŭsia ŭ telefon, byŭ spužany. Zrazumieŭ, što zrabiŭ hłupstva, adyšoŭ ad milicyjantki. Padyšoŭ da mianie čałaviek u cyvilnym, pakazaŭ na mianie rukoj supracoŭnikam milicyi, mianie zatrymali i dastavili ŭ milicyju», — skazaŭ abvinavačany.
Advakat zapytaŭsia ŭ Dźmitryja Cimašenki, ci zajmaŭsia jon palitykaj?
Padsudny kaža, što nikoli ni čym nie ŭdzielničaŭ.
«Chaču paprasić prabačeńnia ŭ paciarpiełaj i ŭ usiaho MUSa. Raskajvajusia», — kaža Dźmitryj z chvalavańniem, chłopiec ledźvie nie zapłakaŭ.
U sudzie dapytali paciarpiełuju supracoŭnicu AUS Centralnaha rajona Homiela Natallu Sinkievič. Jana raspaviała, što 15 listapada była zadziejničana na achovu hramadskaha paradku kala cyrka: infarmavała hramadzianaŭ, što jany nie pavinny ŭdzielničać u niesankcyjanavanych masavych mierapryjemstvaŭ. Pierad cyrkam było masavaje skapleńnie hramadzianaŭ, byli ściahi, ludzi vykrykvali palityčnyja łozunhi.
«Raptam adčuła ŭdar ŭ vobłaść łakcia, telefon palacieŭ uvierch i ŭpaŭ na asfalt. Kaleha Malcaŭ skazaŭ, što bačyŭ, chto heta zrabiŭ. My padyšli da Cimašenki, jon raźbiŭ svoj telefon i pabieh. Tady my pačali jaho zatrymlivać, jon supraciŭlaŭsia, my vykarystali fizičnuju siłu.
Ad udaru ŭ mianie byŭ siniak. Materyjalnaja škoda — raźbity telefon, jaki ŭžo nie pracavaŭ. Telefon byŭ uziaty ŭ kredyt, jaki ja dahetul nie vypłaciła. Materyjalnuju škodu mama Dźmitryja Cimašenki mnie kampiensavała».
Natalla Sinkievič kaža, što joj byŭ naniesieny fizičny bol i maralnyja pakuty: jana adčuvała strach i tryvožnaść za svajho dzicionka, bo kali nachiliłasia padniać telefon, to pabačyła na ziamli nož u futlary. Paciarpiełaja zajaviła kampiensacyju maralnaj škody ŭ pamiery 1000 rubloŭ.
Z mamaj Cimašenki supracoŭnica milicyi nie razmaŭlała, tolki zabrała ŭ jaje hrošy za svoj sapsavany telefon. Ź jaje słovaŭ, nichto pierad joj nie vybačyŭsia.
U sudzie byŭ dapytany śviedka — milicyjant Siarhiej Malcaŭ, jaki taksama zdymaŭ na videa pratest 15 listapada. Jon pakazaŭ, što pačuŭ, jak u paciarpiełaj upaŭ telefon: jana skazała, što ŭ jaje jaho vybili z ruk.
«Ja ŭbačyŭ maładoha čałavieka, jaki adbiahaŭ ad Sinkievič. Ja pajšoŭ da maładoha čałavieka, jon stajaŭ za hrupaj ludziej, ja paprasiŭ jaho padyści, ale jon sprabavaŭ adbiažać, tady ja schapiŭ jaho za kurtku, jon staŭ vyryvacca, my jaho pakłali na ziamlu i zatrymali».
Pierad cyrkam stajaŭ natoŭp ludziej, jakim milicyjaniery nibyta kazali razyścisia. Łozunhi kryčali, atrybuciki nie było. Supracoŭniki milicyi ŭ prysutnaści Siarhieja Malcava nikoha nie zatrymlivali.
Taksama jon nie bačyŭ u Dźmitryja Cimašenki simvoliki, kaža, što stan u padsudnaha byŭ ahresiŭny, a nie spužany.
